खोज

बुटवल,२३ असोज । बुटवल उद्योग बाणिज्य संघको २५ औं अधिवेशन अन्तर्गत भएको चुनावमा कार्यसमिति सदस्य (महिला) तर्फकी उम्मेदवार जमुना पौडेल सर्वाधिक मत पाएर निर्वाचित भएकी छन् । ७ पदाधिकारी र १७ जना सदस्य गरी २४ पदका लागि भएको निर्वाचनमा  पदाधिकारीतर्फ १५०६ र सदस्यतर्फ १५०२ मत खसेको थियो । जमुनाले सबै उम्मेदवारले भन्दा धेरै अर्थात ९३३ मत सहित विजय प्राप्त गरेर रेकर्ड बनाएकी हुन् । उनी हरि अर्याल प्यानलबाट उम्मेदवार थिइन् । ‘पदाधिकारी र कार्यसमिति सदस्य सबै उम्मेदवारहरुमा जमुना पौडेलले पाएको मत सबैभन्दा धेरै ९३३ नै हो’–प्रमुख निर्वाचन अधिकृत बाबुराम पाण्डेले भने । जमुना यसअघिको कार्यसमिति सदस्य थिइन् ।

रोशिल साडी सेन्टरकी सञ्चालक जमुना टेलिभिजन कार्यक्रम प्रस्तोता समेत हुन् ।  निर्वाचन दिनेशप्रसाद श्रेष्ठ र हरि अर्यालले सबै पदमा अलग अलग प्यानल बनाएर प्रतिस्पर्धा गरेका थिए । अध्यक्षमा अर्याल प्यानल सहित निर्वाचित भएका छन् । संघमा रहेर आफूले पाएको जिम्मेवारी इमान्दारीपूर्वक पूरा गरेको, संघले आयोजना गर्ने हरेक कार्यक्रमममा सक्रिय सहभागिता जनाएको र महिला उद्यमी व्यवसायीका पक्षमा पनि काम गरेकाले सर्वाधिक धेरै मत पाएको जमुनाले बताइन् ।

उनीपछि धेरै मत पाउने उम्मेदवारहरुमा कार्यसमिति सदस्य विष्णु घिमिरे पन्त (कमला)ले ८४५, कार्यसमिति सदस्य गणेश प्रसाद भट्टराई र दीपक चापागाईले समन ८३५, सहकोषाध्यक्ष धनकुमारी खनालले ८३०, कोषाध्यक्ष बसन्त ढकालले ८०८ मत पाएका छन् ।