खोज

बुटवल, २१ असोज ।

नेकपा एमाले बुटवल उपमहानगरपालिका वडा नम्बर ४ शाखा कमिटीको आयोजनामा शनिबार पाठेघरको मुखको क्यान्सर निदान सम्बन्धी निशुल्क स्वास्थ्य शिविर सम्पन्न भएको छ ।

बुटवल ४ थकाली समाजको भवन परिसरमा आयोजना गरिएको शिविरमा २०० जना महिलाले चेकजाच गराएको शाखा कमिटीका अध्यक्ष नेदिराम ज्ञवालीले जानकारी दिए ।

शिविरमा महिला तथा प्रसुतिरोग बिशेषज्ञ डा. प्रयाश्चित श्रेष्ठ, डा. सदिक्षा चापागाई, डा. गोकर्ण पन्थी, डा. रमेश भट्टराई, डा. अनिता पुनको टोलीले महिलाहरुको स्वास्थ्य चेकजाँच गरेको थियो ।

स्वास्थ्य शिविर कार्यक्रममा बुटवल उपमहानगरपालिकाका निवर्तमान उपप्रमुख तथा नेकपा एमालेका केन्द्रिय सदस्य गुमादेवी आचार्यले एमालेले महिलाको स्वाथ्य प्रति संवेदनशिल भएर शिविर आयोजना गरेकोमा धन्यवाद ब्यक्त गरिन् ।

आचार्यले महिलाहरु स्वस्थ भए मात्रै परिवार, समाज र राजनीतिमा पनि महिला सहभागिता र सक्रियता हुनसक्ने भएकाले यस्ता खालका कार्यक्रम निरन्तर गर्न आवश्यक रहेको बताइन् । उनले नेपाली महिलाहरुमा पाठेघरको मुखमा हुने क्यान्सरले विकराल रुप लिइरहेको भन्दै समयमै महिलाहरु आफ्नो स्वास्थ्य प्रति सचेत हुनुपर्ने बताइन् ।

स्वास्थ्य शिविरमा चेकजाँचको क्रममा महिलाहरुमा तल्लो पेट दुख्ने, सेतो पानी बग्ने लगायतको समस्या भेटिएको महिला तथा प्रसुतिरोग विशेषज्ञ डा. प्रयाश्चित श्रेष्ठले बताए । डा. श्रेष्ठले यसबाट जोगिन बेलाबेलामा पाठेघरको चेकजाच गर्न आग्रह गरे ।

पाठेघरमा हुने क्यान्सरको कारण महिलाहरुले ज्यान गुमाउन पर्ने अवस्था नआओस् र यो समस्या केही भएपनि न्यूनीकरण होस् भन्ने उद्देश्यले शिविर आयोजना गरिएको एमाले शाखा कमिटी ४ का अध्यक्ष वेदिराम ज्ञवालीले बताए । कार्यक्रममा बोल्दै पार्टीका प्रदेश कमिटी सदस्य टंक पराजुलीले मानिस स्वस्थ हुन सकेमात्रै जस्तासुकै कामहरु गर्न सक्ने बताउदै पार्टीले निरन्तर यस्ता स्वास्थ सम्बन्धी शिविरहरु निरन्तर आयोजना गर्न आवश्यक रहेको बताए ।

शिविरमा उपचार पश्चात निःशुल्क औषधि समेत वितरण गरिएको एमाले शाखा कमिटी सचिव बिण्णु पाण्डेले जानकारी दिए ।