खोज

बुटवल,२१ असोज । नेकपा एकीकृत समाजवादीका शिर्ष नेताहरुले गरिबी र बेरोजगारी अहिलेको मुख्य समस्या भएको बताएका छन । दलाल पूँजीवादका कारण मुलुकमा चरम निराशा र संकट देखा परेको भन्दै त्यसबाट उन्मूक्तिका लागि समाजवादी व्यवस्था अपरिहार्य भएको नेताहरुको भनाइ छ ।

२०६२र६३ सालको जनआन्दोलनपछि जनताको अधिकारलाई संविधानमा लेख्न सफल भएको तर, राजनीतिक रुपमा नेतृत्वमा देखिएको विचलनका कारण मुलुकमा संकट गहिरिँदै गएको नेताहरुको भनाइ छ ।

नेकपा एकीकृत समाजवादीको मेची–महाकाली समाजवादी जागरण अभियान अन्तर्गत आइतबार बुटवल र भैरहवामा भएका जनसभालाई सम्बोधन गर्दै शिर्ष नेताहरुले रोजगारी, समृद्धि र सुशासन राष्ट्रको मुख्य एजेण्डा बन्नुपर्ने बताए ।

भैरहवामा आयोजित जनसभालाई सम्बोधन गर्दै एकीकृत समाजवादीका अध्यक्ष एवं पूर्वप्रधानमन्त्री माधव कुमार नेपालले मुलुक बनाउने एजेण्डाबाट दलहरु विचलित हुँदै गएकाले जनतालाई जगाउने गरी जागरण अभियान सुरु गरिएको बताए । उनले देशव्यापी रूपमा जागरण पैदा गरेको समेत बताए । उनले जनताको जीवन सुधार गर्ने संकल्प बोकेर अभियानमा निस्केकाले देशभरबाट जनताले साथ दिइरहेको बताए । उनले जनताको जीवनस्तर सुधार गर्न आवश्यक रहेकाले जनताकै विचमा जनताका मुत्ता लिएर अगाडि आएको बताए । उनले बेरोजगारी समस्या समाधान गर्ने गरी कृषिबाटै आत्मनिर्भर हुने सकिने बताए । अध्यक्ष नेपालले अझै पनि किसानहरूले समस्या झेलिरहेकाले त्यसका लागि समाधान गर्न सरकारसँग कुरा गर्ने बताए ।

त्यस्तै बुटवलमा आयोजित जनसभालाई सम्बोधन गर्दै पूर्वप्रधानमन्त्री एवं सम्मानित नेता झलनाथ खनालले ३०६२–६३ सालको जनआन्दोलनपछि मुलुकको नेतृत्व दलाल पूँजीवादले गरेकाले देशमा चरम संकट देखा परेको बताए । उनले परिवर्तनको १८ वर्षको अवधिमा पूँजीवादी नेतृत्वका कारण पूँजीवादी शोषण बढ्दै गएको उनले बताए । उनले पूँजीवादी शोषणका कारण गाउँगाउँमा वित्तीय र व्यापारिक शोषण बढेको टिप्पणी गरे ।

‘हिजो सामन्ती शोषण कायम थियो, त्यो भन्दा खतरनाक दलाल पूँजीबादको शोषण हुन्छ’ खनालले भने । नेता खनालले ०६२र६३ पछि बनेको राजनीतिक शक्तिमा आएको दक्षिणपन्थी अवसरवादका कारण मुलुकमा आर्थिक, राजनैतिक संकट गहिरिन थालेको बताए । उनले नेकपा र त्यसबाट बनेको शक्तिले काम गर्न सक्ने अवस्थामा त्यसबाट राजनीति नै विचलित हुँदा यो परिणाम आएको बताए । उनले देशमा भ्रष्टाचार व्यापक रुपमा बढेको बताउँदै यसका लागि समेत अब समाजवादी व्यवस्थाको अपरिहार्य रहेको बताए ।

जनसभामा बोल्दै एकीकृत समाजवादीका महासचिव घनश्याम भुसालले मुलुक बनाउने संकल्पका साथ समाजवादी जागरण अभियान सुरु गरिएको बताए । उनले आफुहरुले भनेको कुरा नयाँ नभए पनि संकल्प र योजनाका साथ मुलुक बनाउने गरी समाजवादी जागरण अभियान शुरु गरिएको बताए । उनले मुलुकका छोराछोरी मुलुकमा बस्न नसकेको अवस्थामा यसले १० वर्षपछि ल्याउने भयंकर खतराबाट मुलुक जोगाउन पनि जागरण अभियान सुरु गर्नुपरेको बताए । उनले बेरोजगारी उन्मूलन गर्ने, देशमा शिक्षा स्वास्थ्यलाई निःशुल्क बनाउने र मुलुकलाई कृषिबाटै समृद्धिमा जाने संकल्पका साथ आफुहरुले योजना अघि सारेको बताए ।

उनले आफूहरुले संविधानको रक्षा गरेको र अब मुलुकमा रहेको गरीबी र बेरोजगारी उन्मूलन गर्ने एजेण्डासहित जनताका बीचमा आएको बताए । उनले बेरोजगारी समस्या समाधान गरी सुसाशन, समृद्विका लागि समाजवादी जागरण अभियान सुरू गरिएको बताए । महासचिव भुसालले मुलुक बर्बाद पार्न खोज्ने सबै शक्तिका विरूद्व लडने बताए । उनले अहिले धर्म र जातिका नाममा लडाएर बेरोजगारी र गरीबी उन्मूलनको मुद्दालाई छायामा पार्ने प्रयत्न गरेको भन्दै त्यसकाविरुद्ध लाग्नुपर्ने बताए ।
भैरहवामा भएको जनसभामा पार्टीका उपमहासचिव डा। विजय पौडेलले समाजवादी पार्टी निर्माणका लागि मेचिमहाकाली अभियान सुरू गरिएको बताए ।

कार्यक्रममा पार्टी रूपन्देहीका कार्यवाहक अध्यक्ष श्रीराम यादव, सचिव सरिता श्रीस, नेता रामबहादुर बस्नेत, युवा नेता शार्दुल मयूर कसौधनलगायतले बोलेका थिए । समाजवादी जागरण अभियानले आइतबारै रुपन्देहीको तिलोत्तमास्थित मणिग्राममा पनि कार्यक्रम गरेको थियो । टोली बुटवलबाट पश्चिमतर्फ लाग्नेछ ।