खोज

धनगढी, २१ असोज ।

नेकपा एमालेका अध्यक्ष केपी शर्मा ओलीले वर्तमान सरकार नागरिकहरूप्रति उत्तरदायी नभएको बताएका छन् ।

सुदूरपश्चिम प्रदेश अधिवेशनको उद्घाटन समारोहमा बोल्दै ओलीले देश र जनतालाई आशा जगाउने बेलामा प्रधानमन्त्री पुष्पकमल दाहाल प्रचण्ड भ्रमणमा केन्द्रित भएको बताएका हुन् । विकासका दृष्टिकोणले पछाडि परेको सुदूरपश्चिमलाई नेकपा एमालेले आधुनिक, विकसित र समृद्ध बनाउन चाहेकोमा उनले जोड दिए ।

‘प्रदेश अधिवेशनमार्फत आउने नयाँ नेतृत्वबाट सुदूरपश्चिम प्रदेशमा रहेका समस्याहरू हल गर्न सक्नु पर्छ । सुदूरपश्चिममा एमालेले चेतना ल्याउनुपर्छ । त्यो जिम्मेवारी अब आउने कमिटीलाई हुनेछ । यस अधिवेशनबाट आउने कमिटीले नेतृत्वको भूमिका खेल्नु पर्छ’, ओलीले भने ।

चन्दन लगाउँदैमा र मानसरोवरमा डुबुल्की गर्दैमा पाप कट्दैन भन्दै ओलीले प्रधानमन्त्री प्रचण्डको आलोचना गरे ।

अहिले देशमा सरकार छ कि छैन ? के दुई धाम गरेर मात्रै हुन्छ ? जनतालाई माया नगरेपछि, देशलाई माया नगरेपछि चन्दन लगाएर गेरु वस्त्र लगाए पनि पाप कट्दैन, मानसरोवरमा डुबुल्की लगाए पनि पाप कट्दैन, राम्रो कर्म गर्न सक्नुपर्छ,’ ओलीले भने ।

एमाले नेतृत्वको सरकारपछि अर्थतन्त्र झन् ओरालो लागेको भन्दै ओलीले वर्तमान सरकारबाट देशको रक्षा हुनसक्ने ठोकुवा गरे ।

‘एमाले नेतृत्वको सरकार ढलेसँगै अर्थतन्त्रको खम्बा पनि ढलेको छ । हत्या हिंसा बढिरहेका छन् ।अपराधी जेलमुक्त भइरहेका छन् ।देश अप्ठेरो अवस्थामा छ,’ ओलीले भने ।

यस्तै ओलीले ३९ किलो सुन कहाँ गयो भनेर प्रश्न गरे । सुन तस्करीको अनुसन्धानमा सरकारले तमासा मात्र गरेको भदै उनले एमालेको सरकारको पालामा कहिले यति, कहिले ओम्नी भन्ने, अहिले १०० केजी सुनमा ६१ केजी भयो ।३९ केजी कहाँ गयो भन्दै प्रश्न गरे ।

ओलीले अधिवेशन कार्यक्रमलाई सम्बोधन गरिरहेकै बेला पछाडिबाट केही युवाहरूले भीम रावल खोइ ? भन्दै प्रश्न गरेका थिए । ओलीले भने चुप लाग्नुस् साथीहरू भन्दै थप नबोली अर्कै प्रसङ्गलाई अगाडि बढाएका थिए ।

ओलीको सम्बोधनसँगै एमाले अधिवेशनको उद्घाटन सत्र सकिएको छ । उद्घाटन सत्रमा ओलीसँगै पार्टीका महासचिव शङ्कर पोखरेल, पार्टीका सचिव लेखराज भट्ट, प्रदेश इन्चार्ज छविलाल विश्वकर्मा, स्थायी कमिटी सदस्य तथा सङ्गठन विभाग प्रमुख काशीनाथ अधिकारी, स्थायी कमिटी सदस्य तथा खेलकुद विभाग प्रमुख कर्णबहादुर थापासहित केन्द्रीय सदस्यहरू सहभागी थिए । यो सँगै अव बन्द सत्र सुरु भएको छ ।

अधिवेशनमा छ सय ७५ प्रतिनिधि सहभागी छन् । अधिवेशनबाट एक सय ५५ सदस्यीय कार्यसमिति चयन हुने छ । जसमा प्रदेशमा अध्यक्षसहित उपाध्यक्ष र सचिव एक÷एक र सह–सचिवमा दुई जना रहने छन् ।