खोज

सल्यान, १९ असोज ।

सल्यानमा पालिकामा कार्यरत कर्मचारीहरुले पेन डाउन गरेका छन् । संघीय निजामती सेवा विधेयक संशोधनको माग गर्दै आन्दोलनमा उत्रिएका सल्यानका स्थानीय तहका कर्मचारीहरुले अत्यावश्यकबाहेक सेवा रोकेका हुन् । जिल्लाको कपुरकोट गाउँपालिकाका कर्मचारीहरुले कार्यालय अगाडी प्रत्येकले आफ्ना माग सहितको कालो पम्पलेट भिरेर धर्ना दिएका छन् । यस्तै छत्रेश्वरी गाउँपालिकामा कार्यरत कर्मचारीहरुले पनि गाउँपालिकाको गेट अगाडी कालो ब्यानर सहित धर्ना दिएका छन् ।

काम नै रोकेर कर्मचारीहरु आन्दोलनमा उत्रीएपछि सेवा प्रभावित भएको छ । सरकारले स्थानीय सेवाका कर्मचारीहरुको मागबारे कुनै चासो नदिएपछि केन्द्रीय संघर्ष समितिको आह्वान अनुसार शुक्रबारदेखि पेन डाउन गरेर आन्दोलन गर्नुपरेको स्थानीय तह कर्मचारी संघर्ष समिति सल्यानका सहसंयोजक तथा छत्रेश्वरी गाउँपालिकाका संयोजक प्रदीप चन्दले जानकारी दिए ।

उनका अनुसार अधिकार प्राप्तीका लागि अनिश्चतकाल सम्मका लागि अत्यावश्यक वाहेकका सेवा ठप्प पारेर आन्दोलनमा उत्रनुपरेको हो । केन्द्रीय संघर्ष समितिले विरोध प्रदर्शनका लागि सबै स्थानीय तहका कर्मचारीलाई काठमाडौँ केन्द्रित आन्दोलनमा आउनसमेत समितिले आग्रह गरेको छ भने काठमाडौँ पुग्न नसक्ने कर्मचारीले आफू कार्यरत स्थानीय तहमा नारासहित कालो ब्यानर राखेर धर्ना दिनसमेत आग्रह गरेको छ । जस अनुसार सल्यानका स्थानीय तहका कर्मचारीहरु पनि आआफ्नो पालिकामा धर्नामा बस्दै दवाव श्रृजना गरेका हुन् ।

मन्त्रिपरिषद्ले पारित गरेर प्रतिनिधि सभामा दर्ता गर्ने तयारीमा रहेको संघीय निजामती सेवा विधेयक संशोधन गर्नुपर्ने उनीहरुको माग छ । स्थानीय सेवाबाटै प्रमुख प्रशासकीय अधिकृत राख्न, एकीकृत निजामती सेवा ऐन जारी गर्न माग गर्दै कर्मचारीहरु आन्दोलनमा छन् ।

यस्तै बिना सहमति ७५३ स्थानीय तहमा चक्रीय प्रणालीमा सरुवा गरिनुपर्ने, निजामतीको परिभाषाभित्र स्थानीय तहका कर्मचारीलाई समेत समेटिनुपर्ने, तीनै तहका कर्मचारीहरूको समान वृत्ति विकासको व्यवस्था गरिनुपर्ने, स्थानीय तहमा कार्यरत कर्मचारीहरूको कर्मचारी कल्याणकारी कोषको अनिवार्य व्यवस्था गरिनुपर्ने, स्थानीय तहका कर्मचारीलाई ट्रेड युनियन अधिकार प्रदान गरिनुपर्ने, अस्थायी तथा करार कर्मचारीहरूको उचित व्यवस्था गरिनुपर्ने लगाएतका माग उनीहरुको छ ।