खोज

सुनवल, १७ असोज ।

पश्चिम नवलपरासीको पाल्हीनन्दनमा परासीस्थित नेपाली सेनाको गोरखदल गणले आयोजना गरेको निःशुल्क स्वास्थ्य शिविरमा एक हजार बढीले विशेषज्ञ चिकित्सक सहितको स्वास्थ्य सेवा लिएका छन् । विशेषज्ञ चिकित्सकसंग चेकजाँचका लागि बुटवल, भैरहवा सम्म पुग्नुपर्ने बाध्यतामा रहेका सिमावर्ती क्षेत्रका जनतालाई सेनाको स्वास्थ्य शिविरले लाभ मिलेको छ ।

पाल्हीनन्दन–३ कुस्मामा रहेको सिद्धार्थ माविमा आयोजित शिविरमा ७ सय १५ महिला र ३ सय १७ पुरुष सहित एक हजार ३२ जनाले विशेषज्ञ सेवा लिएका छन् । दिनभर झमझम दर्किरहेको पानीमा छाता ओडेर सिमावर्ती क्षेत्रका स्थानीय विशेषज्ञ सेवा लिन स्वास्थ्य शिविरमा लामवद्ध थिए । गाउँमै विशेषज्ञ सेवा पाएपछि स्थानीयले खुसि व्यक्त गरेका छन् । गेर्मीका जयन्त्री बानियाले गाउँमै शिविर आयोजना हुँदा धेरै सजिलो भएको बताए । ‘चेकजाँचका लागि परासी जानुपर्दथ्यो । त्यहाँ पनि सबै उपचार हुँदैन, बुटवल भैरहवा पुग्नुपर्ने बाध्यता थियो, गाउँमै डाक्टर आउँदा खुसी लागेको छ” बाँनियाले भने ।

आँखामा समस्या भएर जाँच गराउन आएकी सुमारी चौहानले पनि सहजै निःशुल्क चेकजाँच र औषधि पाएकोमा खुसी व्यक्त गरिन् । अर्का स्थानीय शिवबहादुर चौधरीले हाडजोर्नीको समस्या, छाला सम्बन्धी समस्याको छुट्टाछुट्टै विशेषज्ञ चिकित्सकबाट चेकजाँच गराउँदै यस्ता शिविर त्रैमासिक रुपमा गाउँगाउँमा आयोजना गर्नुपर्ने बताए । ‘सबै चेक गर्न कति दिन धाउनुपर्दथ्यो अहिले गाउँमै एकैछिनमा जाँच पनि भयो औषधि पनि पाईयो”, चौधरीले खुसी व्यक्त गर्दै भने ।

शिविरमा देवदह मेडिकल कलेज र नेपाली सेनाका गरी २० जना भन्दा बढी विशेषज्ञ चिकित्सक सहित ५० जना स्वास्थ्यकर्मीको टोलीले चेकजाँच गरेको हो । स्थानीयलाई स्त्रीरोग, नाक कान घाँटी, मनोरोग, हाडजोर्नी, मुटुरोग, दन्त सेवा लगायतका ११ प्रकारका रोगका विशेषज्ञ सेवा सहित ईसिजी सेवा प्रदान गरिएको थियो । सिमावर्ती क्षेत्रका बासिन्दाले सहजै विशेषज्ञ चिकित्सक सेवा नपाउने समस्यालाई मध्यनजर गर्दै स्वास्थ्य शिविर आयोजना गरेको गोरखदल गण परासीका प्रमुख सेनानी ज्ञानकाजी श्रेष्ठले बताए । दिनभरको झरीमा पनि मानिसहरुको भिडले शिविरको महत्व कति छ भन्ने कुरा दर्शाएको छ”, श्रेष्ठले भने ।