खोज

तिलोत्तमा,१७ असोज । बचत तथा ऋण सहकारी संघ रुपन्देहीका अध्यक्ष प्रकाश भट्टराईले साना सहकारीहरु मर्जरमा गएर एकीकृत भई ठूलो संस्था बन्दा सहकारीको सेवा गुणस्तरीय हुने र शेयरधनीले बढी प्रतिफल पाउनसक्ने बताएका छन् ।

तिलोत्तमाको मणिग्रामस्थित सबैको बचत तथा ऋण सहकारी संस्था लिमिटेडको दोस्रो बार्षिक साधारण सभाको उद्घाटन गर्दै भट्टराईले साना सहकारीहरुले शेयरधनीले खोजे अनुसारको कर्जा प्रवाह गर्न र अन्य गुणस्तरीय सेवा दिन नसक्ने हुंदा एउटै प्रकृतिका सहकारीहरु एकीकृत भएर ठूलो संस्था बन्दा सञ्चालन खर्च घट्न गई शेयर सदस्यले मुनाफा पनि बढी पाउने र संस्थाको गरिमा र विश्वास पनि बढ्ने बताए ।

सबैको वचत तथा ऋण सहकारी ११ वटा सहकारीबीच सफल एकीकरण भएर देशभरमै उदाहरण बनेको र एकीकरणपछि राम्रो वित्तीय प्रगति गरेको भन्दै अध्यक्ष भट्टराईले यसबाट अरु सहकारीले पाठ सिक्नुपर्ने बताए ।
साना सहकारीले दक्ष जनशक्ति राख्न नसक्ने, पारिवारिक ढंगले संस्था चलाउने, पारदर्शिताको अभाव र मनोमानी निर्णय हुने भएकाले थोरै सदस्य भएका र सहकारीको मूल्य मान्यता अनुसार चल्न नसकेका सहकारीहरु बढी समस्यामा परेको र यस्ता साना सहकारीको भविष्य नभएको भन्दै अध्यक्ष भट्टराईले भन्दै सहकारीप्रति विश्वास बढाउन मर्जरमा जानु नै भएको भट्टराईले जोड दिए ।
८० प्रतिशत भन्दा बढी सहकारी स्थानीय तहको नियमनमा पर्ने भएपनि स्थानीय तहको नियमन फितलो भएका कारण पनि सहकारीहरुमा समस्या आउने गरेको अध्यक्ष भट्टराईले औंल्याए ।
संस्थाका अध्यक्ष भरतराज भुसालले बाहिरबाट आएर हचुवाका भरमा खोलेका सहकारीका कारण राम्रा सहकारीको बद्नाम भएको भन्दै सेयर सदस्य बन्नुभन्दा पहिले संचालक र सहकारीका विषयमा बुझ्नुपर्नेमा जोड दिए । उनले हाल संस्थामा ७ हजार २ सय सेयर सदस्य रहेको र २०८३ सम्म शेयर सदस्य बढाएर १२ हजार पुर्‍याउने गरी अगाडि बढेको बताए । भुसालले आगामी ३ वर्षमा ३ अर्र्ब शेयर पुंजी बनाउने लक्ष्य राखेको समेत प्रतिबेदनमार्फत उल्लेख गरे ।
देशभरबाट एकैपटक ११ वटा सहाकारीलाई एकीकरण गरेर पुरस्कार प्राप्त गर्न सफल भएको भुसालले उल्लेख गरे । कार्यक्रममा संस्थाका सचिव देवानन्द पाण्डेले नीति, विधि र प्रबिधिबाट संस्थालाई अगाडि बढाएको हुंदा संस्थापति आकर्षण बढेको बताए ।
सो अवसरमा संस्थाका सल्लाहकार कृष्ण प्रसाद अर्याल, गायत्री पाण्डे , नेत्रप्रसाद पाठक लगायतले संस्थाले शेयर सदस्यको मन जित्ने गरी काम गरेको भन्दै सराहना गरेका थिए । कार्यक्रममा संस्थाका कोषाध्यक्ष इन्दिरा पाण्डेले आर्थिक प्रतिवेदन प्रस्तुत गरेकी थिइन् ।
तीन दिने साधारणसभा अन्तर्गत पहिलो दिन बिहीबार मुख्य कार्यालय मणिग्राम,गोरकट्टा र बांसघारी सेवा केन्द्रका शेयर सदस्यलाई लक्षित गरि मणिग्राममा सम्पन्न गरेको उपाध्यक्ष चुरामणी पाण्डेले जानकारी दिए । दोस्रो चरणको कार्यक्रम भलवारी, सेमरा बजार र भरवलिया सेवा केन्द्रका सदस्यहरुलाई लक्षित गर्दै बिहीबार भलवारीमा गर्ने र शुक्रबार शिवचोक, नन्दनवन र शिवपुर सेवाकेन्द्रका सदस्यलाई लक्षित गरी चार नम्बरमा कार्यक्रम राखिएको संस्थाका ब्यवस्थापक हरिहर पौडेलले बताए । कार्यक्रममा सडक दुर्घटनामा मृत्यु भएका शेयर सदस्यका परिवारलार्ई १ लाख ५० हजार राहत रकम समेत प्रदान गरिएको सचिव देवानन्द पाण्डेले जानकारी दिए ।