खोज

बुटवल, १७ असोज ।

नेपाल रेडक्रस सोसाइटी जिल्ला शाखा रुपन्देहीबाट सैनामैनामा सञ्चालित सुपर प्रोजेक्टका लागि खुल्ला गरिएको सामाजिक सहजकर्ता (कर्मचारी) विज्ञापनमा लिइएको लिखित र मौखिक परीक्षा विवादास्पद बनेको छ ।

असोज १२ गते लिइएको लिखित परीक्षामा सम्मिलित अधिकांश परीक्षार्थीहरु नेपाल रेडक्रस सोसाइटी रुपन्देहीको रवैया देखेर आक्रोशित बनेका छन् । सहभागी परीक्षार्थीले विपद व्यवस्थापन सम्बन्धी विज्ञ बोलाएर सञ्चालन गर्नुपर्ने परीक्षा छनोट समिति आफूले प्रश्नपत्र निर्माण गरी परीक्षा अगावै चुहावट गरी परीक्षाको मर्यादा नराखेको गुनासो गरेका छन् । सहभागीका अनुसार रेडक्रसका केन्द्रीय अध्यक्ष सुदर्शन नेपालको पारिवारिक व्यक्ति राख्नका लागि परीक्षाको न्यूनतम मर्यादा नराखी लिखित परीक्षा सञ्चालन गरिएको र अन्तर्वार्ता असोज १६ गते दिउँसो १ः३० बजे लिने भनी सूचना गरिएको तर चार घण्टा बित्दा समेत सुरु नभएपछि परीक्षार्थीहरुबाट व्यापक गुनासो आएपछि मंगलबार स्थगीत भयो भनी बताइएको थियो ।

सैनामैना नगरपालिकामा स्वीस रेडक्रसको सपोर्टमा तीन वर्षका लागि सुपर प्रोजेक्ट लञ्च हुँदैछ । रेडक्रसको स्थापित मान्यता, निष्पक्षता, तटस्थतालाई ख्याल गरी सञ्चालन गर्नुपर्नेमा परीक्षामा जिल्लाका पदाधिकारीहरुबिच नै विवाद भएको छ । यस सम्बन्धमा जिल्ला सदस्य समेत रहेका केन्द्रीय अध्यक्ष सुदर्शन प्रसाद नेपालसँग जिज्ञासा राख्दा यसबारे आफूलाई केही जानकारी नभएको भन्दै उम्किए । “म काठमाडौंमा छु, जिल्लाले लिने परीक्षाको सबै प्रक्रियामा मेरो कुनै संलग्नता छैन, मेरो भूमिका पनि छैन”– उनले भने ।

रेडक्रसका जिल्ला अध्यक्ष दिपक क्षेत्री न्यौपानेले यो सबै काम पदपुर्ती समितिले गरेकाले यसबारे आफूलाई कुनै थाहा नभएको भन्दै पन्छिए । “हामीले पदपुर्ती समितिलाई जिम्मा लगाएका छौं, परीक्षाको सबै काम सोही समितिले गरेकाले मलाई यसबारे केही थाहा छैन”–उनले भने ।

पदपुर्ती समितिका सदस्य एवं शाखाका मन्त्री रामचन्द्र उपाध्यायसँग जिज्ञासा राख्दा उनले लिखित परीक्षा सम्पन्न भएको तर अन्तर्वार्ताको लागि समितिको कोरम नपुगेले स्थगीत भएको बताए । “समितिका संयोजक बाहिर भएकाले बाँकी ४ जनामध्ये दुईजना आउनुभएन, त्यसकारणले अन्तर्वार्ता रोकिएको हो”–उनले भने । परीक्षा सञ्चालन प्रक्रियाको लागि केन्द्रले खटाएका व्यक्ति विज्ञको रुपमा रहेको उनले दावी गरे ।

प्रदेश अध्यक्ष कृष्ण पंगेनीले विज्ञकै उपस्थितिमा प्रश्नपत्र निर्माण र परीक्षा सञ्चालन गर्नुपर्नेमा त्यसो नभएको गुनासो आएको बताए । “म प्र्रदेश सदस्य हो, यसबारे प्रदेशको भूमिका हुँदैन, तर विज्ञकै सहभागितामा प्रश्नपत्र निर्माण र परीक्षा सञ्चालन हुनुपर्ने हो”–उनले भने ।

यस विषयमा सुपर प्रोजेक्ट कोअर्डिनेटर दिवाकर सुवेदीले यसका लागि पाँचजनाको पदपुर्ती समिति रहेको र त्यसैले सबै काम गरेको बताए । पदपुर्ती समितिका संयोजक बाहिर भएकाले बाँकी ४ जना मध्ये २ जना मात्र अन्तर्वार्ताको क्रममा उपस्थित भएको र बाँकी २ जना नआएकाले अन्तवार्चर्ता स्थगीत भएको आफूले सुनेको बताए ।