खोज

बुटवल, १७ असोज। मार्शल आर्ट अन्तरगतको कराते खेल र खेलाडीलाई ब्यवस्थित एवं मर्यादित बनाउने उद्येश्यका साथ लुम्बिनी प्रदेश रेफ्री कमिटि गठन भएको छ । नेपाल कराते महासंघ, लुम्बिनी प्रदेशको आयोजनामा दाङ, तुल्सीपुरमा सम्पन्न भएको प्रदेश स्तरिय बैठक तथा रेफ्री भेला कार्यक्रम २०८० बाट रुपन्देहीका कृष्ण प्रसाद देवकोटाको संयोजकत्वमा ९ सदस्यीय कमिटि सर्वसम्मत निर्वाचित भएका हुन । भेलाबाट सह–संयोजकमा रीना राना (बाँके), सचिव मोहलाल थापा मगर (दाङ), सह–सचिव डम्मर बहादुर सोमै (कपिलबस्तु), सदस्यहरु गोपी पुन (नवलपरासी), मोलन घर्ति (रोल्पा), बसन्त केसी, मनिराम चक्रवर्ती (बर्दिया), शंकर बिसी (प्युठान) बाट निर्वाचित भएका छन ।

संयोजक देवकोटा नेपाल सितोरियो कराते संघ रुपन्देहीका पूर्ब अध्यक्ष, राष्ट्रिय तथा अन्तरराष्ट्रिय कराते रेफ्री, प्रदेश खेलकुद परिषद लुम्बिनीका पूर्ब कोषाध्यक्ष पदमा रहेर कराते खेल विकासमा महत्वपूर्ण भुमिका निर्वाह गरेका छन । संयोजक देवकोटाले पदभार ग्रहण गर्दै कराते खेलको गरिमालाई अझ उच्च बनाउनका निमित्त सबैको साथ र सहयोगसहित अघि बढ्ने बताए । कराते खेलको खेलाडीमात्र नभई प्राविधिक उत्पादनको पक्षमा समेत पहल जरुरी रहेको भन्दै वृहत तालिम, सेमिनारहरु संचालन गरि क्षमता विकासमा जोड दिने बताए ।

कार्यक्रमको समुद्घाटन गर्दै कराते वरिष्ठ प्रशिक्षक बलराज नेपालीले नेपाली खेलकुद जगतमा देशको शिर उच्च बनाउन बिशेष महत्व राख्ने खेलहरु मध्येको एक कराते खेल भएको दाबी गरे । यस खेललाई अझ व्यवस्थित र मर्यादित बनाउने उदेश्यका साथ आफुहरु प्रदेशस्तरमा रेफ्री कमिटि गठन गरेर योजनाबद्ध रुपमा अघि बढेको बताए । नेपाल कराते महासंघको सहकार्यमा आगामी दिनमा थप कार्यक्रमहरुलाई अघि बढाउने उनले बताए ।

महासंघ, लुम्बिनी प्रदेश अध्यक्ष पदम बहादुर बस्नेतले कराते खेल, खेलाडी र रेफ्रीको महत्वबारे प्रकाश पार्दै सबै जना आआफनो भुमिका र उत्तरदायित्व प्रति सचेत हुनुपर्ने सुझाव दिए । सबैको सहकार्यमा खेल विकास हुने उनले बताए ।

कार्यक्रममा रुपन्देहीका कराते प्रशिक्षक माधव घिमिरे, महासंघका सचिव रामु सुनारले कराते खेलाडी उत्पादनमा विद्यालयस्तरमा प्रशिक्षणलाई थप प्रभावकारी रुपमा अघि बढाउन जरुरी रहेको बताए । कार्यक्रममा लुम्बिनी प्रदेशका बिभिन्न १२ जिल्लाका प्रतिनिधि, सिनियर कराते प्रशिक्षक, खेलाडी, रेफ्रीहरुको बृहत उपस्थिती रहेको थियो ।