खोज

बुटवल,१७ असोज । नेपालगञ्जमा सर्वपक्षीय बैठकले कर्फ्युलाई क्रमशः खुकुलो बनाउँदै हटाउन सुरक्षा समितिलाई अनुरोध गरेको छ ।

जिल्ला प्रशासन कार्यालयमा बसेको बैठकले सामाजिक सञ्जालमा सद्भाव विरोधी गतिविधि गर्नेलाई तत्काल कारबाही गर्ने निर्णय गरेको छ ।

बैठकले सद्भाव भड्किन नदिन सबैले आ आफ्नो ठाउँबाट प्रतिबद्धता गर्दै सद्भाव र्‍याली निकाल्ने निर्णय गरेको छ । बैठकमा सांसद डा। धवलशमशेर राणा, प्रदेश सांसद कृष्णा केसी नमूना, नेपालगञ्जका मेयर प्रशान्त विष्ट, उपमेयर कमरुद्दिन राई, प्रमुख जिल्ला अधिकारी विपिन आचार्य, सुरक्षा निकायका प्रमुख, नागरिक समाजका अगुवा उपस्थित थिए।

नेपालगञ्जमा मंगलबार दिउँसो १ बजेदेखि कर्फ्यू लगाइएको छ। बुधबार दिनभरि नै नेपालगञ्ज शान्त रहेको छ । ठूलो संख्यामा परिचालित प्रहरीले अत्यावश्यक काममा हिँडेकोबाहेकलाई हिँड्न दिएको छैन । बाँके प्रहरी प्रवक्ता डीएसपी नारायण डाँगीले अत्यावश्यक काममा हिँडेका व्यक्तिलाई सोधपुछ गरेर जान दिइएको बताए ।

नेपालगञ्जका सडकमा प्रहरीको उपस्थिति मात्रै देखिन्छ । सडक सुनसान छन् । फाटफुट निस्केकालाई फिर्ता पठाइएको छ । जरुरी काममा हिँडेकालाई जान दिइएको छ । प्रहरीले सोधपुछ गरेर सहजीकरण गरेका छन् । नेपालगञ्ज नाकामा अहिले कोही पनि फसेका छैनन् । भारतबाट बिहान आइपुगेका सबैलाई सम्बन्धित ठाउँतिर पठाइएको छ । नाकाबाट ट्यांकर, फलफूल बोकेका गाडी भित्रिएका छन् ।