खोज

बुटवल,१६ असोज । प्रमुख प्रतिपक्षी दल नेकप एमालेका अध्यक्ष केपी शर्मा ओलीले फागुन १ गते सरकारले दिएको सार्वजनिक विदा खारेज गर्न चेतावनी दिएका छन् । फागुन १ माओवादीले सशष्त्र युद्ध शुरु गरेका दिनमा कुनै हालतमा राष्ट्रिय विदा दिन नसकिने भन्दै अब आउने क्याबिनेट वैठकबाट उक्त विदा खारेज गर्न चेतावी दिएका हुन् । अन्यथा एमालेले त्यसको प्रतिरोध गर्ने ओलीले बताए । ओलीले गृहमन्त्री नारायणकाजी श्रेष्ठको कार्यशैली माथि पनि प्रश्न उठाएका छन्।

प्रतिनिधिसभाको मंगलबारको बैठकमा बोल्ने क्रममा उनले भ्रष्टाचारी, तस्कर र हत्याराहरुको संरक्षण गर्दै सुशासनको गफ नदिन पनि श्रेष्ठलाई भनेका छन्।

श्रेष्ठले हेटौंडामा पुगेर आइतबार सुशासन र भ्रष्टाचारविरुद्धको अभियानमा आफू प्रतिबद्ध भएर लागेको बताएका थिए।

यसलाई लिएर उनले कडा टिप्पणी गर्दै गृहमन्त्री नै भ्रष्टहरुको संरक्षणमा लागेको बताए। सुन तस्करीबारेको आयोग बनाऊँ भन्दा गृहमन्त्री नै विरोधमा उत्रिएको आरोप ओलीले लगाए।
ओलीले सरकारको सिफारिसमा संविधान दिवसका अवसरमा भएको कैद मिनाहाप्रति प्रश्न उठाएका छन् ।

संविधान दिवसका अवसरमा मन्त्रिपरिषदको सिफारिसमा राष्ट्रपति रामचन्द्र पौडेलले ज्यान मुद्दामा सजाय पाएका नेपालगञ्जका योगराज ढकाल रिगलको कैद माफी गरिदिएका थिए ।