खोज

यो वर्ष पनि नेपालीहरूका चाडपर्व घरदैलोमै आईपुगेका छन । चाडपर्व आउँदा हरेक नेपालीमा खुसी र उमंग छाउनु स्वाभाविक हो । चाडपर्वमा रमाउने नेपाली परम्परा हो । चाडपर्वले खुसी नै लिएर आउँछन तर त्यो खुसी सवैका लागि उत्तिकै प्रिय नहुन सक्छन । यसपाली पनि चाडपर्व नजिक आएकै बेला पश्चिमका विभिन्न जिल्लामा खाद्यान्न संकट छ । सरकार कति हुस्सु छ । सरकारका निकाय कति गैर जिम्मेवार छन भन्ने कुरा सुन्दा पनि कहालीलाग्दो अवस्था छ । सवै चाडपर्वमा रमाउने बेला आएको छ तर सुदूर पश्चिमका दुर्गम पहाडी जिल्लाका स्थानीय बासिन्दा चामलको अभावमा यो बर्षको दशैं तिहार खल्लो हुने चिन्तामा छन । दुर्भाग्य नेपाल खाद्य संस्थान कुहिएको चामल विक्री गरिरहेको छ ।

दूरदराजका मानिसलाई सरकारले समेत अवहेलना गर्दै आएको छ । नेपाल खाद्य संस्थानमाथि बर्षौदेखि कुहिएको चामल वितरण गर्ने गरेको आरोप लाग्दै आएको छ । यो आरोपमात्र नभएर यथार्थ पनि हो । १० बर्ष अघि ठिक यही समस्या देखिएपछि सरकारले खाद्य संस्थानका तत्कालीन डिपो प्रमुखलाई कारवाही गरेको थियो । अहिलेपनि त्यही अवस्था छ । कुहिएको चामल वितरण गर्ने काम रोकिएको छैन । त्यहाँका जनता समेत बोल्न सक्दैनन् । चाडपर्वको बेला लाईन लागेर एक दुई पाथी चामल लिन डिपो चाहार्नुपर्ने बाध्यता छ । कुनै गुनासो गरे त्यही कुहिएको चामल समेत नपाउने बिडम्वना छ । विडम्वना सुदूर पश्चिमका जनताका लागि खाद्यान्न संकटको समाधान कहिल्यै हुन सकेन । अहिले मुख्य समस्या अछाम, कालीकोट, डोल्पा, जाजरकोट, दैलेख लगायतका क्षेत्रमा देखिएको छ । पश्चिम क्षेत्रमा खाद्यान्नको अभाव भएको धेरै पहिलेदेखि सञ्चार माध्यममा आईरहेको विषय हो । तर यो गम्भीर विषयमा सरकारको ध्यान पुगेको छैन ।

जनता कसरी बाँचिरहेका छन् र उनीहरूलाई कसरी राहत दिन सकिन्छ भन्ने विषयमा सम्वन्धित निकायलाई कुनै चासो छैन । एकातिर खाद्य संकटको समाधान नहुनु र अर्कोतिर आर्थिक अवस्थामा सुधार नहुनुका कारण सुदूरका जनता झनै प्रभावित भैरहेका छन । अव पनि सरकारले हात्तीका मुखमा जिरा भने झै एक दुई ट्रक खाद्यान्न वितरण गरेर जिम्मेवारी पूरा भएको ठान्नु हुँदैन । खाद्यान्नमात्र होइन बाढी पहिरोको प्रकोपले सुदूर पश्चिममा समस्या झनै विकराल भएको छ । दर्जनौं घर पहिरोमा परेका छन । कैयौं विस्थापित समेत भएका छन तर यो समस्याका विषयमा मानौं बेखवरको अवस्था देखिएको छ । पश्चिमी क्षेत्रमा देखिएको खाद्यान्न संकटको अवस्थाले सबैलाई गम्भीर बनाएको छ । समय छँदै सचेत नहुने र समस्या समाधानमा चासो देखाउन भैरहेको ढिलाईले थप समस्या उत्पन्न हुन सक्छ । अव संघीय र सुदूर पश्चिम सरकारको यो विषयमा ध्यानाकर्षण होस् । चाडबाडको बेला कुहिएको चामल विक्री गर्ने गैर जिम्मेवार खाद्य संस्थानका विभागीय कर्मचारीमाथि कारवाही होस् । सुदूरका जनतालाई सधै हेपिरहने अवस्थाको अन्त्यका लागि त्यहीका जनता जाग्नुपर्ने बेला आएको छ । सवै नेपाली चाडपर्वमा रमाउने बेला त्यहाँका जनता त्यही कुहिएको चामलका लागि दिनभर लाईन वस्नुपर्ने अवस्था उत्पन्न हुनु भनेको गंभीर चिन्ताको कुरा हो । सरकारसंग थोरै पनि मानवीयता छ भने सुदूरका जनतालाई भेडाबाख्राको व्यवहार गर्न वन्द गर । पैसा तिरेर पनि राम्रो चामल किन्न नपाउने बर्षौदेखिको बिडम्वना अव अन्त्य गर ।