खोज

बुटवल, १५ असोज । रूपन्देहीका ज्येष्ठ नागरिकले सरकारबाट घोषणा गरिएका सेवा सुविधाहरू पाउन नसकेको दुखेसो गरेका छन । मन्त्रालयले उपलब्ध गराएको ज्येष्ठ नागरिक परिचय पत्रमा उल्लेख गरिएका छुट तथा सुविधाहरू कागजमा मात्रै सिमित भएको बताए । ज्येष्ठ नागरिक ऐनले तोकेको यातायात तथा स्वास्थ्य उपचारमा ५० प्रतिशतको छुट नपाउँदा आफुहरु मर्कामा परेको सुनाए ।

३३ औँ अन्तर्राष्ट्रिय ज्येष्ठ नागरिक दिवसका अवसरमा मानवअधिकार तथा शान्ति समाज रूपन्देहीले गरेको अन्तक्र्रिया तथा स्वास्थ्य शिविर कार्यक्रममा बोल्ने ज्येष्ठ नागरिकले सहजै सेवा सुविधा पाउनुपर्ने माग गरे । समाजले बुटवल ११ मा रहेको नवदुर्गा मन्दिरमा अन्तक्र्रिया तथा स्वास्थ्य शिविर कार्यक्रम गरेको हो । समाजका जिल्ला सभापति खिमप्रसाद भट्टराई (कृष्ण) ले देबीनगरका ज्येष्ठ नागरिकलाइ समेटेर कार्यक्रम गरिएको र उनीहरूलाइ मिठाइ फलफूल तथा लस्सी खुवाइएको बताए । कार्यक्रममा बोल्दै राष्ट्रिय भूमि आयोग रूपन्देहीका अध्यक्ष हरिबहादुर आचार्य क्षेत्रीले ज्येष्ठ नागरिकलाई उचित सम्मान दिनुपर्ने बताए । बुटवल ११ मा ज्येष्ठ नागरिकलाई बस्ने र रमाउने बाटीका बनाउन पहल गर्ने उल्लेख गरे ।

समाजका केन्द्रिय सल्लाहकार तथा निबर्तमान सभापति गोविन्द खनालले हरेक जेष्ठ नगरिकले परिवारमा आत्मसम्मान बोध गर्ने वातावरण हुनुपर्ने र युवापु्स्ताले मातापितालाइ माया दिनुपर्ने उल्लेख गरे । सो अबसरमा बुटवल ११ का वडाध्यक्ष रामचन्द्र क्षेत्री, बुटवल ११ ज्येष्ठ नागरिक मञ्चका अध्यक्ष दण्डपानी पौडेल, बाबुराम खनाल, मन्दिर भजन मण्डलीका राधिका ज्ञवाली, क्षितिज टोलका अध्यक्ष भगवती पन्थी, पूर्व डिएसपी बिष्णुबहादुर कार्की लगायतले बोल्दै सरकारले सम्मान सम्मान गर्न नसकेको गुनासो सुनाए ।

समाजका जिल्ला उपसभापति कपिल ज्ञवाली, सचिव कृष्ण प्रसाद पाण्डे, कार्यक्रम संयोजन समाजका कार्यसमिति सदस्य अर्जुन कुवरले जेष्ठ नागरिकको सेवासुविधाबारे खबरदारी जरुरी रहेको बताए ।