खोज

सुनवल, १५ असोज ।

पुर्व राष्ट्रपति डा.रामवरण यादवले मुलुकमा महत्वपूर्ण राजनैतिक उपलब्धि हासिल भईसकेकाले अब आर्थिक परिवर्तनको आवश्यकता रहेको बताएका छन् । सोमबार पश्चिम नवलपरासीको प्रतापपुर गाउँपालिकामा निर्मित विपि कोईरालाको शालिक अनावरण कार्यक्रममा बोल्दै उनले नयाँ संविधान जारी भएसंगै मुलुकले महत्वपूर्ण उपलब्धि हासिल गरेकाले अब आर्थिक क्रान्तिको आवश्यकता रहेको बताए ।

सबै वर्ग जातजाती भाषा धर्मलाई अहिलेको संविधानले समेटेको उल्लेख गर्दै उनले संविधान कार्यान्वयनको पाटो भने पेचिलो बन्दै गएको बताए । दलहरुले संविधानको पूर्ण कार्यान्वयनका लागि भूमिका खेल्नुपर्नेमा जोड दिदै पुर्व राष्ट्रपति यादवले जनताले त्यसमा खबरदारी गर्नुपर्ने बताए । ‘जनताले वाचडगको रुपमा काम गर्नुपर्छ, दलहरुले बाटो विराउन सक्छन् खबरदारी निरन्तर जरुरी छ’, यादवले भने ।

फरक प्रसंगमा पुर्व राष्ट्रपति यादवले अहिले चुरे क्षेत्र दोहन भईरहेको बताउँदै त्यसको नियन्त्रण गर्न नसके अन्नभण्डार तराईको भूमि मरुभुमिमा परिणत हुने चिन्ता व्यक्त गरे । ‘सरकारले चुरे क्षेत्र संरक्षणमा प्रभावकारी काम गर्न सकेको छैन् यादवले भने, अब चुरे दोहन रोकिएन् भने तराई मरुभुमिका परिणत हुन्छ ।’

पछिल्लो समय मुलुक भित्र उत्पादन घटेर विदेशबाट आयात वृद्धि भएको प्रति उनले चिन्ता व्यक्त गरे । विगतमा विदेश समान निर्यात गर्ने मुलुक अहिले हरेक कुरा आयातमा निर्भर भएको बताउँदै उनले नेपाली जनतामा काम गर्ने प्रवृत्ति हराउँदै जानु सुखद संकेत नभएको बताए ।

शालिक अनावरणपछि आयोजित कार्यक्रममा बोल्दै काँग्रेस लुम्बिनी प्रदेश सभापति अमरसिंह पुनले प्राप्त उपलब्धि संस्थागत गर्न दलहरु एकजुट हुनुपर्नेमा जोड दिए । महामन्त्री विक्रम खनालले दलहरुले आ–आफ्नो एजेन्डाको साथ राजनीति गरेपनि राष्ट्रका मुलुभुत एजेन्डामा एक साथ रहँदै आएको बताए । नेकपा माओवादी केन्द्रकी केन्द्रीय सदस्य दुलारी हरिजनले मुलुकमा परिवर्तन आएपनि महिलालाई हेर्ने दृष्टिकोणमा अझै परिवर्तन आउन नसकेको उल्लेख गरिन् ।

कार्यक्रममा प्रदेश सभा सदस्य विश्वप्रेम पाठक, पुर्व राज्यमन्त्रीहरु रामवच्चन यादव, घनश्याम यादव, काँग्रेस नवलपरासी सभापति अर्जुन कुमार पोखरेल, नेकपा एमालेका जिल्ला अध्यक्ष दिपेन्द्र कुमार अधिकारी, जिल्ला समन्वय समिति प्रमुख भगौती यादव, काँग्रेस क्षेत्रिय सभापति मुकुल आचार्य, गाउँपालिका उपाध्यक्ष मान कुमारी चौधरी लगायतले बोलेका थिए ।

प्रतापपुर गाउँपालिकाले सूर्यपुरामा १० लाखको लगानीमा नेपालका पहिलो जननिर्वाचित प्रधानमन्त्री विपि कोईरालाको अर्धकदको शालिक निर्माण गरेको गाँउपालिका अध्यक्ष उमेशचन्द्र यादवले जानकारी दिए । विपि जयन्तीको अवसरमा शालिक अनावरण गरिएको हो । शालिक अनावरण कार्यक्रमको नेपाली काँग्रेसकै संस्थापन पक्षले भने बहिष्कार गरेको छ ।