खोज

सल्यान, १४ असोज । आत्मनिर्भर विद्यालय बनाउने अभियानमा रहेको सल्यान सिद्ध कुमाख गाउँपालिकाको निराजन माध्यमिक विद्यालयमा अक्षयकोष स्थापना भएको छ । शैक्षिक क्रियाकलाप र श्रृजनशिल कार्यका लागि जिल्लाकै नमुना बनेको यस विद्यालयमा अर्काे एक अक्षयकोष स्थापना भएसंगै आत्मनिर्भर विद्यालय बनाउने अभियानमा टेवा पुगेको छ । सिद्धकुमाख, ३ ढोरचौरमा रहेको निराजन माविमा जिल्लाकै छत्रेश्वरी गाउँपालिका, १ दमाचौर निवासी अर्जुन चन्दले आफ्नो स्वर्गीय आमाको सम्झनामा एक लाख १० हजार १०१ रूपैयाँको अम्बिकादेबि चन्द स्मृति पुरस्कारका लागी अक्षकोष स्थापना गरेको विद्यालयका प्रधानाध्यापक धर्मराज घर्तीले जानकारी दिए ।

यस अक्षयकोषबाट कक्षा ११ को पशु विज्ञान विषयमा उत्कृष्ट नतिजा ल्याउने विद्यार्थीलाई पुरस्कृत गरिने छ । आफु पनि कृषि प्राविधिक विषयको विद्यार्थी भएकाले कृषि प्राविधिक पढ्ने विद्यार्थीको हौसला र सानो भएपनि सहयोगका लागि स्वर्गीय आमाको वार्षिक पुन्यतीथिको अवसरमा विद्यालयलाई अक्षयकोषका लागि रकम सहयोग गरेको अर्जुन चन्दले बताए । निराजन माविमा यस अघि पनि एक लाख रूपैयाँ राशीको तिलक गिरी स्मृती अक्षयकोष रहेको छ । यस कोषबाट कक्षा ८ मा उत्कृष्ट नतिजा ल्याउने विद्यार्थीलाई पुरस्कृत गर्नेगरिन्छ ।

निराजन माविले एक करोड रूपैयाँको आत्मनिर्भर कोष बनाउने लक्ष्य सहित अभियान जारी राखेको छ । प्रधानाध्यापक घर्तीले कोषका लागि रकम जुटाउन आफैबाट सुरुवात गरेका थिए । अहिले कोषमा ३४ लाख रूपैयाँ भन्दा बढी रकम जम्मा भइसकेको उनको भनाई छ । ‘विद्यार्थीको सिकाई उपलब्धी हाँसिल गर्न र विविध शैक्षिक क्रियाकलापका लागि आत्मनिर्भर विद्यालय बनाउने अभियानमा छौँ’, प्रअ घर्तीले भने, ‘हाल सम्म ३४ लाख बढी रकम कोषमा जम्मा भइसकेको छ ।’ कार्यविधि अनुसार कोष सञ्चालन हुने र यस कोषको रकमबाट प्राप्त व्याजमात्रै शैक्षिक क्रियाकलापका लागि खर्च गर्न सकिने उनको भनाई छ ।

वि.सं २०४५ मा स्थापना भएको निराजन माविमा २०७६ बाट प्राविधिक धार सञ्चालनमा छ । विद्यालयको आफ्नै पशु उपचार केन्द्र पनि रहेको छ । केन्द्रबाट डाक्टर सहित ७ जनाको जनशक्तिले सेवा प्रदान गर्दै आएको विद्यालयका प्रअ तथा पशु उपचार केन्द्रका संरक्षक घर्तीले बताए ।