खोज

बर्दघाट, १३ असोज ।

चीनमा जारी एशियाली खेलकुद अन्तर्गत पुरुष क्रिकेट प्रतियोगिताको दोश्रो चरण प्रवेशका लागि नेपाल र माल्दिभ्सबिच भोलि (आइतबार) प्रतिष्पर्धा हुँदै छ । तुलनात्मक रुपमा नेपाल भन्दा कमजोर मानिएको माल्दिभ्स विरुद्ध टि ट्वान्टी क्रिकेटमा यो खेल नेपालको दोश्रो भेट हो ।

नेपालले रेकर्डका ताँती लगाउँदै मंगोलियालाई २७३ रनको बिशाल रनले हराउन सफल भएको थियो । मंगोलियाबिरुद्धको फर्म कायम राख्दै माल्दिभ्सबिरुद्ध हावी हुने रणनीतिमा हुनेछ नेपाल ।

नेपाल र माल्दिभ्स बीचको खेल नेपाली समय अनुसार बिहानको ६ बजेर ४५ मिनेटमा प्रारम्भ हुने एशियन गेम्सले जनाएको छ । माल्दिभ्स २० ओभर खेल्ने रणनीतिका साथ मैदानमा उत्रिने छ भने नेपालको रणनीति अलि पृथक हुनेछ । नेपाली टीम बिशाल लक्ष्य बनाएर नयाँ रेकर्ड बनाउने रणनीतिमा हुनेछ भने बलिङ आएमा भने सस्तैमा समेट्ने रणनीति रहनेछ ।

नेपाल र माल्दिभ्सविच यसअघि एकमात्र टि ट्वान्टी क्रिकेट प्रतियोगिता सम्पन्न भएको छ । टियु ग्राउण्डमा २०१९ डिसेम्बरमा सम्पन्न प्रतियोगितामा नेपाल ५ विकेटले विजयी भएको थियो । सन २०१९ मा पहिलो पटक अन्तर्राष्ट्रिय टि ट्वान्टी प्रतियोगिता खेल्न सुरु गरेको माल्दिभ्सले अहिलेसम्म २७ प्रतियोगितामा सहभागिता जनाएको छ जसमा २१ खेलमा पराजित भएको छ भने ५ वटा प्रतियोगितामा जित निकालेको छ । एउटा खेल नतिजा विहिन भएको थियो ।

नेपालले अहिलेसम्म कुल ५८ वटा अन्तर्राष्ट्रिय टि ट्वान्टी प्रतियोगिता खेलेको छ । जसमा ३४ खेलमा जित निकालेको छ भने २३ खेलमा पराजित भएको छ । एउटा खेल नतिजा विहिन भएको छ । आइसीसी वरियतामा नेपाल १६ औँ स्थानमा रहेको छ । एशियाली खेलकुदमा मँगोलियालाई फराकिलो अन्तरले पराजित गरेसँगै नेपालले एक अँक सुधार गर्दै १६ औँ स्थानमा उक्लिएको हो भने माल्दिभ्स वरियताको ७८ औँ स्थानमा रहेको छ ।

नेपाल र माल्दिभ्स दुबै राष्ट्र एसोसिएट राष्ट्रको रुपमा रहेका छन् । एशियाली खेलकुदमै माल्दिभ्सले मँगोलियालाई ९ विकेटले पराजित गर्दै अघिल्लो चरण प्रवेशको सम्भावना कायमै राखेको छ । अँक तालिका अनुसार नेपाल एक खेलमा जित हात पार्दै २ अँक (नेट रनरेट १३.६५) का साथ समूहको शीर्षस्थानमा रहेको छ भने माल्दिभ्स पनि एक खेलमा जित हात पार्दै समान २ अँक (नेट रनरेट ६.३०) का साथ समूहको दोश्रो स्थानमा रहेको छ । नेपाल र माल्दिभ्स दुबै देशसँग पराजित मँगोलिया समूह चरणबाटै बाहिरीएको छ । भोली (आइतबार) हुने खेलको विजेताले एशियाली खेलकुदको दोश्रो चरण प्रवेश पक्का गर्नेछ ।