खोज

बुटवल, १३ असोज । घरेलु तथा साना उद्योग कार्यालय रूपन्देहीमा अहिले पनि दर्ता भएका उद्योगहरू बन्द गर्नको लागि उद्योगीहरूले आवेदन दिने दिनप्रतिदिन नै छ । कतिपयले आर्थिक मन्दीको कारण व्यापार व्यवसाय घटेको भन्दै व्यवसायबाट पलायन भएको समेत बताउँदै आएका छन् । ‘अघोषित रूपमा भनिएको आर्थिक मन्दी’ को समयमा समेत यसलाई चुनौतिको रूपमा लिए कतिपय व्यवसायीहरूले भने ठूलो लगानीदेखि स–सानो लगानी पनि उद्योग व्यवसाय स्थापना तथा बिस्तारमा लागेका छन् ।

रूपन्देही जिल्लामा असाेज महिनाको १२ गते सम्ममा करोड बढि लगानीका उद्योगदेखि लिएर व्यवसायिक प्रतिष्ठान स्थापना भएका छन् । पछिल्लो समयमा रूपन्देहीको ४० करोड लागतमा वृज ग्लास उद्योग सञ्चालनमा आएको छ । केडिया अर्गनाइजेशन अन्तर्गत रहेको वृज सेफ्टी ग्लास उद्योगले शुक्रबार देखि उत्पादन सुरु गरेको छ । रोहिणी गाउँपालिका वडा नम्बर–४ छिपागढमा उद्योगले अत्याधुनिक मेशीन जडान गरि उत्पादन सुरु गरेको हो ।

केडिया अर्गनाइजेसन देशमा प्रतिष्ठीत औद्योेगीक घराना हो । जसको १४ वटा भन्दा बढि ब्रान्डमा नेपाली उत्पादन भैरहेको छ । सिमेन्ट देखि बैंक सम्म, दूधदेखि ग्लास हाउस सम्मको उत्पादन यो समूहले गर्दै आएको हो । विभिन्न आकार, मोटाइ तथा जीवन्त रङ्गहरूमा लेमिनेटेड शिशा, टिन्ड शीशा, इन्सुलेटेड शीशा, रीफ्लेक्टिभ शीशा लगायत उपलब्ध गराउने अर्गनाइजेसनका प्रवन्ध निर्देशक उत्सव केडीयाले बताउँछन । उनले आर्थिक मन्दीको कारण समस्या भएको बेलामा मजदुरहरूको रोजगारीका लागि पनि यस्तो प्रकृतिको उद्योग स्थापना गरिएको जानकारी दिए ।
कम्पनीले आवासीय, व्यवसायिक, संस्थागत तथा औद्योगिक परियोजनाहरूको संरचनागत तथा सजावट आवश्यकताहरू पूर्ति गर्दै आइरहेको उनले बताए । “आफ्ना उत्पादनमार्फत सुन्दर र व्यवहारिक समाधान प्रदान गर्ने अटल प्रतिबद्धता लिएको वृज सेफ्टी ग्लास उद्योग नवप्रवर्तन र गुणस्तरको अग्रपङ्क्तिमा उभिएको छ । केडीयाले भने–‘वृज सेफ्टी ग्लास उद्योगको सफलताको केन्द्रमा भने यसको अत्याधुनिक प्रशोधन प्लान्ट नै रहेको छ ।’

कारखानामा नेपालमै सबैभन्दा ठूलो दैनिक १२ हजार वर्ग फीट सिसा उत्पादन गर्ने क्षमता रहेको उनले बताए । कम्पनीले त्रुटि र कमीको सम्भावना लगभग शून्य नै हुने गरि पूर्ण रूपमा कम्प्यूटराइज्ड र स्वचालित उत्पादन गरिरहेको केडीयाले बताए । कम्पनीका सबै उपकरणहरू यूरो मापदण्ड अनुसार रहेका छन । यसले गर्दा वृज सेफ्टी ग्लासका हरेक उत्पादन अन्तर्राष्ट्रियस्तरको हुनेमा ढुक्क हुन सकिने केडीयाको भनाइ छ । ४० करोडको लगानीमा उद्योग स्थापना भएको र यसमा २ सय बढीले रोजगारी पाएका छन । उद्योगको अध्यक्ष मनोज केडिया, निर्देशकहरू गौरव अग्रवाल, अजय गुप्ता र सतीश केडिया रहेका छन । यस्तै प्रबन्ध निर्देशक सत्यम केडियाले रोजगारीका अवसर सिर्जना गर्ने र आर्थिक वृद्धिलाई प्रवद्र्धन गर्ने कम्पनीको प्रतिबद्धतालाई मूर्त रूपमा कार्यान्वयन गरि नेपालको उन्नतिमा योगदान पु¥याउन समर्पित रहेको बताए ।

यस्तै आर्थिक मन्दीको बेला व्यवसायीक योजनाको हिम्मत गरी व्यवसाय स्थापना गर्ने अर्को समूहको सिद्धार्थ भूमी समुह । राम प्रसाद घिमिरे, ब्यवसायीहरू रितेश सिलवाल र नारायण केसीको संयुक्त ६० करोड लगानीमा घर निर्माणमा आवश्यक पर्ने नेपालकै ठूलो निर्माण र ईन्टेरियर सामानको थोक बिक्री केन्द्रको शोरुम बिहीबार बाट मणिग्राममा सुरु भएको छ ।

आर्थिक मन्दीको समयमा पनि व्यवसायीहरूको हिम्मतले साथ दिएको बताएका छन् । विगत २५ वर्षदेखि फर्निचर, प्लाईउडको क्षेत्रमा अनुभवी रहेका तीन जनाले सञ्चालनमा ल्याएको सिद्धार्थ भुमी ग्रूप भित्र एउटै छानामुनी सबै निर्माण सामग्री उपलब्ध हुने सिद्धार्थ भूमी ग्रूप निर्देशक रितेश सिलवाल बताउँछन् । १ बिघा क्षेत्रफलमध्ये १४ हजार स्क्वायर फुटमा आकर्षक स्वरुम सहितको ईन्टेरियर नेपालकै ठुलो भएको दाबी उनको छ । यो समुहले काठमाडौं जडिबुटी र बुटवलको मिलनचोकमा सेवा शुभारम्भ गर्ने छ । निकट भविष्यमा ईटहरि र पोखरामा शाखा खोल्ने तयारी रहेको उनले बताए । एक सय जनालाई रोजगार दिन सफल भएको यो समुहको प्रयास पनि सह्रानीय रहेको बताइएको छ ।
यहि असोज महिनामा पनि डेढ करोड लगानीमा बुटवलमा फ्रेन्जाईजको रूपमा गणपति मिष्ठान्नको शुभारभ गर्ने अर्का व्यवसायी हुन मेघदेव पन्त । सैनामैनामा कृषि फार्म चलाएका उनले एक दर्जन बढिलाई रोजगार दिने गरी यो फेन्चाईज स्वरुम सञ्चालनमा ल्याएका थिए । मेघराज पन्थको करिव डेढ करोड एक लगानीमा देवीनगरमा उक्त शाखा शुभारम्भ भएको हो ।

यस्तै बुटवलमा लामो समय देखि सोन्दर्य सम्बन्धी काम गर्दै आएकी अर्की व्यवसायी हुन मोनिका क्षेत्री । मोनिका क्षेत्रीले डेढ करोड लगानीमा बुटवलमा छाला र कपाल उपचार क्लिनिक सञ्चालनमा ल्याएकी छिन् । दश वर्षदेखि ब्युटिपार्लर व्यवसाय गरिरहेकी क्षेत्रीले विशिष्टिकृत सेवा दिने उद्देश्यले बुटवल बीपीचोकमा छाला र कपाल उपचार क्लिनिक सञ्चालनमा ल्याएकी हुन् ।

क्लिनिकमा केन्द्रिय कारागार अस्पताल, पिपुल हस्पिटल लगायतका अस्पतालमा लामो समयदेखि काम गर्दैै आएका वरिष्ठ छाला तथा सौन्दर्य रोग विशेषज्ञ डा.विक्रान्त ढकाल र काठमाडौँ किल्निक अफ कस्मेटिक सर्जरीमा कार्यरत डा.ज्योति शाहले सेवा प्रदान गर्ने प्रबन्धक निर्देशक क्षेत्री बताउँछिन् । शैलुन र स्किन एण्ड हेयरमा गरी १ करोड ५० लाख लगानी रहेको सो शैलुनमा अहिले १२ जनाले रोजगारी पाएका छन् । स्किन एण्ड हेयरमा थप ५ जनाले रोजगारी पाउने उनको भनाई रहेको छ ।
बुटवलदेखि पाल्पाको बसन्तपुर चल्ने केवलकारको कम्पनीले ४० लाख लगानीमा यहि असोज महिनामा नै जिपलाईन सुरुवात गरेको छ । गत असोज ५ गते लुम्बिनी केबलकार लिमिटेडले टप स्टेशन बसन्तपुरमा साहसिक खेल जीपलाइन सञ्चालनमा ल्याएको छ । ४० लाख लागतमा बनेको जीपलाइन एक सय ५० मिटर लम्बाईको छ । बुटवलको बमघाटमा रहेको बटम स्टेशनबाट केबलकार चढेर पालपाको तिनाउ गाउपालिका ३ बसन्तपुर आउने पर्यटकलाई साहसिक खेलको आनन्द र मनोरन्जन दिलाउन जीपलाइन सञ्चालन गरेको कम्पनीका इन्जिनियर सनी चौरसियाले बताउँछन् ।

यो पनि असोज महिनामा नै शुभारम्भ भएको हो । असोज महिना शुभ महिनाको रूपमा समेत हेरिने भएको कारण व्यसायीहरूले यो महिनालाई व्यवसाय शुभारम्भको महिनाको रूपमा समेत लिने गरेको पाईन्छ ।

अर्थशास्त्रका जानकार मनिकर कार्कीका अनुसार व्यवसायीहरूको लगानीमा सुधार हुनु नेपाली अर्थतन्त्रमा सुधारको संकेत भएको बताउँछन् । उनले व्यवसायीहरूको कदमलाई सकारात्मक रूपमा लिनु पर्ने भन्दै भने–‘हरेक कालो बादलको छेउमा चाँदीको घेरा हुन्छ भने जस्तै आर्थिक मन्दी र संकटको अन्त्यमा नयाँ आशाको सृजना हुन्छ । ’ उनले राज्यले स्थीर आर्थिक नीति र लगानीमैत्री वतावरण निर्माण गरी अर्थतन्त्रमा विश्वासको वातावरण सृजना गर्नुपर्ने दायित्व समेत रहेको बताउँछन् । लगानी गर्ने क्षेत्रको पहिचान गर्दै विस्तृत विश्लेष्ण, अध्यायन गरी लगानी गर्नुपर्ने अर्थशास्त्री कार्कीको भनाई छ ।

अहिले नेपालमा भैरहेको लागानी सकारात्मक नभएको भन्दै यसको विस्तृत अध्यायन गरेर मात्रै लगानी गर्नको लागि सुझाव समेत दिए । उनले बढ्दो आर्थिक मन्दीलाई थप चलायमान बनाउनको लागि सरकारी निकायबाट ठोस कदम चाल्नुपर्नेमा व्यवसायीहरूले स–सानो रूपमा जम्मा भएको पुँजीलाई लगानी गरी सुरुवात गरिएको व्यवसायले पक्कै पनि देशको आर्थिक विकासमा ठुलो योगदान पुग्ने बताउँछन् । लगानी गरिएको लगानीबाट भ्यालु एडेड हुने खालको गरी लगानी गर्नुपर्ने आवश्यकता नै अहिलेको रहेको अर्थसास्त्री कार्कीको भनाई छ । भैरहवा क्षेत्रमा सावँरिया स्वीट्स, बुटवलमा नेपाली लुगा घर पनि करोड बढि लगानीमा भदौ महिनामा शुभारम्भ भएका छन् । जसले पनि केही सुधारको अपेक्षा गरिएको छ ।