खोज

बुटवल, १२ असोज ।

एमालेको बिहीबार बुटवलमा बसेको लुम्बिनी प्रदेश कमिटीको बैठकले पुसभित्रै सबै जिल्लाहरूका अधिवेशन गर्ने निर्णय गरेको छ । लुम्बिनीमा १२ जिल्ला छन् । तीमध्ये रूकुम पूर्वमा मंसिरमा र अन्य जिल्लाको पुसभित्र गर्ने निर्णय गरेको केन्द्रीय सचिव तथा प्रदेश इन्चार्ज पद्मा अर्यालले जानकारी दिइन् ।

भदौ १६ गते राधाकृष्ण कँडेलको नेतृत्वमा प्रदेश कमिटी चयन भएपछि बिहीबार पहिलो पूर्ण बैठक बसेको हो । बैठकलाई सम्बोधन गर्दै सचिव अर्यालले अहिलेको कमिटीले आगामी संघ, प्रदेश र स्थानीय तहको चुनाव गराउने र पार्टीको ११ औं महाधिवेशन गराउने भएकाले विशेष जिम्मेवारीका साथ काम गर्नुपर्ने बताइन् ।

उनले अधिवेशनमा प्रतिस्पर्धालाई स्वाभाविक ठानेर प्रतिस्पर्धाबाट उत्पन्न मनोविज्ञानको अन्त्य गरी पार्टीलाई एकढिक्का बनाउनुपर्ने गरी योजना बनाउन निर्देशन दिएकी थिइन् । ‘निर्वाचनका बेला प्रतिस्पर्धा स्वाभाविक हो भन्ने वातावरण गराउने हो, विधानको पूर्ण प्रयोग गर्नुस्,’ उनले भनिन्, ‘व्यक्तिलाई केन्द्र मानेर विधान नमिच्नुस् । अवैधानिक कमिटी सूचना पाएको अर्को दिन भंग गरिनेछ । हरेकसँग विधान र नियमावलीका दस्तावेज हुनुपर्‍यो, कमिटीको महत्व र जिम्मेवारी नहुँदा चाहियो भन्ने काम गर्दा लैजा भन्ने कुरा अराजकता हो ।’

सचिव अर्यालले जनतामा एमालेले भनेजस्तो, सोचेजस्तो काम गरेन भन्ने गुनासो बढेको विषयलाई ध्यान दिँदै यसलाई व्यवहारबाटै जवाफ दिन सक्नुपर्ने बताइन् । पार्टीमा फुर्सदका बेला काम गर्ने मात्र नभएर कम्युनिस्ट पार्टीको आचरणअनुसार काम गर्ने कार्यकर्ता जन्माउनु पर्ने उनको भनाइ थियो । पार्टीका जिम्मेवारीमा बसेकाहरुको आचरण सुधार गर्नुपर्ने भन्दै उनले कम्युनिस्ट पार्टीका कार्यकर्ता विचारमा पनि स्पष्ट हुनुपर्ने बताइन् ।

नेतृ अर्यालले निर्णय कार्यान्वयनमा एकरूपता, संगठनात्मक चुस्तता बनाउँदै समुदायका एजेन्डा र नागरिकका समस्यामा सहभागिता हुनेगरी पार्टीका योजना बनाउनुपर्ने बताइन् ।

बैठकले अधिवेशनको समीक्षा गर्दै सचिवालय गठन, विभागीय जिम्मेवारी बाँडफाँड, जनसंगठनको भेला, पार्टी इतिहास लेखन र स्कुल विभाग संचालन तथा कार्यालय व्यवस्थापनका विषयमा टुंगो लगाएको प्रचार विभाग प्रमुख डिआर घिमिरेले बताए ।

लुम्बिनीमा सबैभन्दा पहिले अधिवेशन भएकाले जिल्लाहरुको पनि पहिले अधिवेशन सक्नेगरी योजना बनाइएको पनि उनले बताए ।