खोज

पाल्पा, १० असोज ।

पाल्पामा बालविवाह गर्न लागेको एक जोडी फरार भएको छ । जिल्लाको निस्दी गाउँपालिका –१ राउवनकी १८ वर्षीया बालिकाको विवाह हुन लागेको अवस्थामा प्रहरी आउन लागेको खबर थाहा पाउन साथ त्यो जोडी फरार भएको हो ।

राउनवमा बालविवाह हुन लागेको जानकारी पाउनासाथ प्रहरी, वडाका जनप्रतिनिधि र पालिकाका कर्मचारी बालिकाको घर पुुगे पनि उनीहरु त्यहाँ फेला पर्न सकेनन् । ती बालिकाको नवलपुरको बौद्धिकालीमा विवाह हुन लागेको जानकारी प्राप्त हुुन साथ टोली उनको घर पुुगे पनि त्यहाँ कोही पनि नभेटिएको गाउँपालिकाका बालमैत्री कार्यक्रमका फोकल पर्सन कुुशमाखर पाण्डेले बताए । उनले भने, ‘प्रहरी आएको थाहा पाएर हतार हतारमा विवाह गरेर लगि सकेको हुन सक्ने भएकाले हामीले नवलपुर प्रहरी प्रशासनलाई जानकारी गराई सकेका छौं ।’ उनका अनुुसार अहिलेसम्म कुनै पनि जानकारी प्राप्त भएको छैन ।

यहाँ कैयौं बालविवाहरु रद्द समेत भएका छन् । ४ असोज २०८० मा वडा नं ३ खादरकी १८ वर्षीया बालिका र वडा नं. ४ घोरमाका २१ वर्षीय युवकबीच भएको विवाह रद्द भएको थियो । दुवैका आमाबुबाको मञ्जुरीमा असोज ४ गते उनीहरुको मागी विवाह भएको थियो तर विवाह भएको एक दिनमै उनीहरुको विवाह रद्द भएको हो । यस्तै सोही दिन वडा नं ७ ज्यामिरे चारघरेकी १६ वर्षीया बालिका र वडा नं. ४ मित्यालका १८ वर्षीय बालकबीच भएको विवाह पनि रद्द भएको छ । गत असारमा पनि वडा नं ४ झ्यालटुुङ्गकी १६ वर्षीया बालिकाको नवलपरासीका एक केटासँग बालविवाह भएको थियो । उनीहरुको पनि जनप्रतिनिधि, प्रहरीको पहलमा अभिभावकसँग समझदारी गरी विवाह रद्द गरिएको छ ।

बालिकाको उमेर नपुग्दै बाल विवाह गरेको भन्दै यहाँका जनप्रतिनिधि, प्रहरी र पालिकाका कर्मचारीहरुले अभिभावक र केटाकेटीको समझदारीमा दुुवै जोडीको विवाह रद्द गरेका हुन् । वडाका जनप्रतिनिधि, प्रहरी र पालिकाका बालमैत्री स्थानीय शासन कार्यक्रमका फोकल पर्सन सहित दुुवै पक्षका अभिभावकहरुको छलफलबाट विवाह रद्द गरेर ती बालबालिकालाई आफन्तको जिम्मा लगाइएकोे छ । कानुनी रुपमा विवाह गर्न अझै केही वर्ष बाँकी छ । २० वर्षपछि यही जोडिले राजीखुशीमा विवाह गर्न चाहेमा विवाह गर्ने शर्तमा कागज बनाएर बाल विवाह बदर गरेको पाण्डेले बताए ।