खोज

सल्यान, १० असोज । सल्यान शारदामा ग्रामीण भेगका विद्यालय समेत प्रविधिमैत्री हुँदै गएका छन् । खरीपाटीबाट, चक र चकपछि मार्करले ह्वाइटबोर्डमा लेखेर अध्यापन गराउने विद्यालयका शिक्षकहरूले अब भने स्मार्ट तरिकाले अध्यापन गराउदैछन् । शारदा नगरपालिकाले सामुदायिक विद्यालयहरूलाई डिजिटल प्रविधिमा जोडिरहेको छ भने शिक्षकले अव ल्यापटपमा शैक्षिक सामग्री राखेर स्मार्ट टिभीमा अध्यापन गराउनेछन् । गत वर्ष १४ वटा विद्यालयमा ल्यापटप वितरण गरेको शारदा नगरपालिकाले मंगलबार नगरपालिकाभित्र रहेका १६ वटा सामुदायिक विद्यालयहरूलाई स्मार्ट टि.भि. वितरण गरेको छ ।

सामुदायिक विद्यालयका शिक्षालाई आधुनिक र प्रविधि युक्त बनाउने उदेश्यले शैक्षिक सामग्री वितरण गरेको नगर प्रमुख प्रकाश भण्डारीले जानकारी दिए । नगरलाई डिजिटलमैत्री नगर बनाउन लागिपरेको भन्दै उनले डिजिटल माध्यमबाट अध्यापन गराउँदा विद्यार्थीमा सिकाइ उपलब्धि बढेर जाने बताए ।

बालबालिकाहरूलाई आधुनिक प्रविधिवाट पठनपाठन गरेमा विद्यार्थीको पढाइमा सुधार हुने भन्दै नगरप्रमुख भण्डारीले विद्यालयको भौतिक संरचना निर्माणमा पनि स्थानीय सरकार, प्रदेश सरकार र केन्द्र सरकारले पनि विद्यार्थीको पढाइलाई पहिलो प्राथमिकतामा राख्नुपर्ने धारणा राख्छन् । नव प्रवर्तन साझेदारी कोष पठन सिपमा सुधार कार्यक्रम अन्तर्गत प्रविधिमैत्री शिक्षण सिकाइलाई जोड दिदै बालबालिकालाई श्रब्य दृष्य सामग्रीहरू मार्फत पठन पाठन गराउने उद्देश्यले नगरपालिकाले स्मार्ट टिभि वितरण गरेको हो । स्मार्ट टिभी वितरण कार्यक्रममा प्रमुख प्रशासकीय अधिकृत सानुबाबु अधिकारी, शिक्षा शाखा प्रमुख संगिता बुढा, विभिन्न विद्यालयका शिक्षकहरूको उपस्थिति रहेको थियो ।