खोज

नेपाल प्रहरीले चाडपर्वका बेला हुने लूटपाट, चोरी लगायतका समाजमा हुने गंभीर प्रकृतिका घटना नियन्त्रणका लागि विशेष अभियान सञ्चालन गर्ने भएको छ । लूटपाट, चोरी र डकैतीका घटनामात्र होइन, चाडपर्वकै समयमा दुर्घटना समेत बढ्ने भएकोले प्रहरीको ध्यान त्यसतर्फपनि जानु जरुरी छ । विगतका बर्षहरूमा यतिबेला अभियान सुरु भैसक्थ्यो तर यो बर्ष ढिलाई भएको छ । अहिले नेपालीहरूको दुई ठूला पर्व दशैं र तिहार सन्निकट छन् । चाडपर्व नजिक आएको बेला हरेक बर्ष दुर्घटना बढ्ने गरेको छ । दुर्घटनाका कारण ज्यान गुमाउनेहरूको परिवारमा पर्ने बज्रपातको कल्पनासम्म पनि गर्न सकिदैन । धेरै दुर्घटना यस्तै चाडपर्वको बेला नै बढी हुने गरेको इतिहास नै छ । दशैं तिहार मनाउन नेपालबाट मात्र होइन विदेशबाट समेत नेपालीहरू आउनेक्रम सुरु भएको छ । यस्ता दुर्घटनाले मानवीय विपत्ति निम्त्याउँदै छ । दशैं तिहारकै समयमा सार्वजनिक सवारीका साधनमा भीड हुने गर्दछ । अन्ततः सवारी साधनको भीड, यात्रुको चाप, सडकको दुरावस्था र चालकको लापरवाहीले दुर्घटना नियन्त्रण भन्दा पनि बढ्दै गएको छ । दुर्घटना नियन्त्रणमा यी पक्षबीच सहकार्य आवश्यक छ । नेपालीमात्रका पर्वहरू हामीले जति रमाइलोसंग मनाउने तयारी गर्दैछौं कतिपयलाई भने यी पर्व दुःखमा परिणत हुन सक्छन । तसर्थ यस विषयमा सम्वन्धित निकायले पूर्व तयारी अर्थात दुर्घटना नियन्त्रणमा ध्यान दिनु जरुरी छ । विगतमा दशै र तिहारको बेलामा सवारी दुर्घटनाका बिभत्स घटनाहरू समेत भएको अझै स्मरणमा छन् । यी घटनाहरूबाट कैयनको अनाहकमा ज्यान गयो भने कैंयौ गम्भिर भएको विर्सन सकिदैन् ।

कतिपय दुर्घटनाका कारण कैयौं परिवारको भविष्य अन्धकारमा रुमल्लिएको पनि धेरै उदाहरण छन । तसर्थ सम्वन्धित निकायले चाडपर्वमा अझै बढी दुर्घटना नियन्त्रणका उपायका लागि पहल गर्नु जरुरी छ । अहिले मादक पदार्थ सेवन गरेर सवारी हाँक्नु, ट्राफिक नियम कानुनको अधिकांशले जानीजानी दुरूपयोग गर्नु, क्षमताभन्दा बढी यात्रु राखेर सवारी चलाउनु जस्ता कारणले दुर्घटनाको संख्या वृद्धि भएको छ । तराई र पहाडमा हुने दुर्घटनाको प्रकृतिमा केही फरक देखिन्छ । तराईमा मोटरसाइकल र नीजि जीप दुर्घटनाका घटना बढिरहेका छन भने पहाडी क्षेत्रमा सार्वजनिक सवारीका साधन दुर्घटनाको जोखिममा रहेका छन । त्यसमाथि चाडपर्व केन्द्रित दुर्घटना लापरवाहीको पराकाष्ठा पनि हो । खासगरी तराईमा हुने दुर्घटना बढ्दै गएको छ । त्यसको नियन्त्रणमा ट्राफिक प्रहरीको ध्यानाकर्षण पनि हुँदै आएको छ । फेरीपनि दुर्घटनाको ग्राफ बढिरहेको छ । मूख्य समस्या चाडपर्वमा मदिराको प्रयोग मूख्य कारण हो । तसर्थ यो समयमा मदिरा प्रयोगमा नियन्त्रण एउटा राम्रो उपाय हुनसक्छ । नेपाल प्रहरीले चाडपर्व केन्द्रित दुर्घटना नियन्त्रणमा ध्यान पु¥याउनु जरुरी छ ।

ट्राफिक प्रहरीले समेत हरेक बर्ष चाडपर्व आउँदै गर्दा चेकजाँचमा कडाई गर्नु जरुरी छ । नेपाल प्रहरीले यो बर्षपनि चाडपर्व केन्द्रित अभियान सञ्चालन गर्दैछ । अभियानले दुर्घटना नियन्त्रणमा सहयोग पुग्यो भने मात्र त्यो प्रभावकारी हुनेछ । दशैं तिहारको बेला बजार अनुगमन गरेजस्तो दुर्घटना नियन्त्रण अभियानलाई पनि औपचारिक गरिनुहुँदैन । आगामी दिनमा हुने सवारी दुर्घटनाका विभत्स घटना रोक्न सवारी सञ्चालक, यातायात व्यवसायी, प्रहरी प्रशासन र स्वयं सरकारसमेत आ–आफ्नो ठाउँबाट जिम्मेवार ढंगले लाग्न अति जरुरी छ । नेपाल प्रहरीले चडपर्वलाई ध्यानमा राखेर विशेष अभियान सञ्चालन गर्दैछ । त्यो अभियान प्रभावकारी बनोस् । केवल दुर्घटनाको कुरामात्र होइन, चोरी, लूटपाट लगायतका घटना समेत बढ्ने भएकोले सम्वन्धित निकायको ध्यान जानु जरुरी छ । प्रहरी प्रशासनले अव यो अभियान सुरु गर्न ढिलाई गर्नु हुँदैन ।