खोज

बुटवल, ६ असोज ।

सक्षम बचत तथा ऋण सहकारी संस्था बुटवल ८ को १६ औँ वार्षिक साधारण सभा शनिवार बुटवलमा सम्पन्न भएको छ । २०६५ साल असार २५ गते सहकारी डिभिजन कार्यालय रुपन्देहीमा दर्ता भएको सहकारीमा आर्थिक वर्ष २०७९÷८० को अन्त्य सम्ममा कुल ४४३ शेयर सदस्यहरुले आर्थिक कारोवार गरिरहेको र सहकारीले सहकारीका आधारभूत क्षेत्र र सिद्धान्त भन्दा बाहिर रहेर कार्य नगरेकोले वर्तमान समयमा देखिएका सहकारीता सम्बन्धी समस्याहरु नरहेको कुरा अध्यक्ष लिलाधर लुइटेलले बताए ।

कार्यक्रमको उदघाटन गर्दै रुपन्देही बचत तथ ऋण सहकारी संघका अध्यक्ष बसन्त प्रसाद ढकालले पछिल्लो समयमा जिल्ला बाहिर केन्द्रीय कार्यालय रहेर रुपन्देहीमा आर्थिक कारोवार गरिरहेका सहकारीका गतिविधिले रुपन्देहीको सहकारी क्षेत्रमा नागरिकहरुले शंका गरिरहेको अवस्थामा सक्षम सहकारीले आफ्नो कार्यमा नमुना पेस गरेको र अन्य सहकारीहरुलाई यो नमुना अनुशरण गर्नका लागि अनुरोध गर्दै शुभकामना दिए ।

कार्यक्रममा अर्थशास्त्री दीपक रायमाझीले सहकारीहरु आफ्ना आधारभूत सिद्धान्त र न्यून पँुजी भएका नागरिकहरुलाई गोलबद्ध गर्ने कार्यमा लाग्नु पर्ने र आम नागरिकहरुले ब्याजको प्रलोभन वा अन्य आशामा स्थानीय भन्दा बाहिरका सहकारीहरुमा कारोवार नगर्न अनुरोध गरे । उनले पछिल्लो समयमा सहकारीहरुले अनुत्पादनशील क्षेत्रमा घुमाउरो तरिकाले कर्जा प्रवाह गरिरहेकोले उक्त गतिविधिमा सहभागिता नराख्न सुझाव समेत दिएका थिए ।

कार्यक्रममा ७० वर्ष पुगेका जेष्ठ नागरिकहरु लेखनाथ पौडेल, चक्रपाणी कंडेल र तुल्सिराम भुसाललाई सम्मान गरिएको थियो भने २०८० सालको एसईई परीक्षामा सामुदायिक र संस्थागत विद्यालयबाट उत्कृष्ट नतिजा हासिल गर्ने शेयरधनीका छोराछोरीहरुबाट एक एक जना गरी ४ जना, असल दैनिक बचतकर्ता र बाल बचतमा एक–एक जना विविए छात्तवृत्ति प्राप्त एक जनालाई सम्मान गरिएको शिक्षा उप समिति संयोजक मोहन भट्टराईले बताए ।
कार्यक्रममा उपाध्यक्ष देविराम पाण्डे, समाजसेवी युवा दीपक खड्कालगायतले पनि मन्तव्य व्यक्त गरेका थिए ।