खोज

गुल्मी, ५ असोज । गुल्मीको सदरमुकाम तम्घास नजिकै रहेको एउटा सडकको कालोपत्रे गर्ने काम गत आठ वर्षदेखि अलपत्र अवस्थामा परेकोे छ । सदरमुकाम तम्घासदेखि खाम्सेपानी–नयाँगाउ–नादी–सूर्यटारी सडक अन्तर्गत बीच भागमा रहेको करिब ३ किलोमिटर सडक कालोपत्रे गर्ने काम आठ वर्षदेखि अलपत्र बनेको हो । सडक निर्माणको जिम्मा लिएका निर्माण व्यवसायीले सो सडकको सात पटकसम्म निर्माण सम्पन्न गर्नका लागि म्याद थप गरेपनि हालसम्म काम सम्पन्न हुन सकेको छैन ।

पाल्पा सडक डिभिजन कार्यालय हुँदै, तम्घास सिमलटारी प्यूठान सडक, सडक पूर्वाधार विकास कार्यालय शिवपुर कपिलवस्तु हुँदै अहिले उक्त सडक निर्माणको काम सडक पुर्वाधार विकास कार्यालय गुल्मीले हेर्दै आएको छ । सडकको सुरुको खण्ड तम्घास खाम्सेपानी अन्तरगत सुपा खोलासम्म साढे दुई किलोमिटर कालोपत्र हुन बाँकि छ ।

निर्माण व्यवसायीले पटकपटक ठेक्का सम्पन्न गर्ने म्याद थप गर्दै जाने तर काम कहिल्यै पनि पुरा नगर्ने परिपाटीले गर्दा सडक निर्माणको काम समयमा हुन नसकेको हो । सडक निर्माणको जिम्मा पाएको लोहोनी एण्ड ब्रर्दश प्रालि चितवनले अन्तिम पटक भन्दै २०८० साल असारसम्मको म्याद थप गरेको थियो । म्याद थप गरेपनि अहिलेसम्म बाँकि सडक कालोपत्रे गर्ने काम अझै शुरु हुन सकेको छैन ।

२०७१ साल असार ३१ गते सम्झौता भई २०७२ साल चैत्र ३० गते सम्पन्न गर्ने गरी लोहोनी एण्ड ब्रर्दश प्रालिले ७ करोड १९ लाख ८७ हजार रूपैया लागतमा निर्माणको जिम्मा लिएको थियो । कार्यालयसँग कामको सम्झौता गरे पनि निर्माण व्यवसायीले समयमै काम सम्पन्न नगरिदिँदा त्यस क्षेत्रका नागरिकले ठूलो समस्या खेप्दै आईरहेका छन । रेसुङ्गा नगरपालिकासँग जोडिएको मुख्य नाकाको सडक वर्षैदेखि अलपत्र हुँदा नगरपालिकाले समेत गंभिर रूपमा ध्यानाकर्षण भएको जनाएको छ । नगरपालिकाले सडक निर्माण कार्य समयमै सम्पन्न गर्न निर्माण व्यवसायीलाई पटक पटक भेटेर ताकेता गर्दा समेत खासै चासो नदेखाएको रेसुङ्गा नगरपालिका प्रमुख खिलध्वज पन्थीले जानकारी दिए । उनले निर्माण व्यवसायीसँग भेटेर कुरा गर्दा अगाडि मुखले गर्छु भनेर ठिक्क पार्ने तर काम नगर्ने बानिले आफुहरूले पनि हैरानी खेप्नु परेको गुनासो गरे । नगर प्रमुख पन्थीले कामको जिम्मा लिएर समयमा काम सम्पन्न नगर्ने र काम अलपत्र पारेर नागरिकलाई सास्तीदिने त्यस्ता व्यवसायीलाई सम्बन्धित कार्यालयले कालोसूचिमा राखेर कार्वाही प्रकृया अघि बढाउनु पर्ने बताएका छन ।

सडक कालोपत्रे नहुँदा त्यस क्षेत्रका नागरिकले महँगो भाडा तिरेर सदरमुकाम आउनु पर्ने बाध्यता छ । सडकको कालोपत्रे गर्नका लागि नाली र ग्राभेल गर्ने काम समेत सम्पन्न भैसकेको थियो । तर लामो समयसम्म काम नहुँदा सडकको ग्राभेल समेत पानीले बगाएर खाल्डा परिसकेको छ । जसका कारण बर्षादमा हिलो र हिउँदमा धुलोमा यात्रा गर्न नागरिकहरू बाध्य बनेका छन ।

सडक पुर्वाधार विकास कार्यालय गुल्मीका प्रमुख सचित्तानन्द चौधरीले निर्माण व्यवसायीको लापर्वाहीका कारण समयमा काम नगर्दा लामो समयदेखि सडक निर्माण अलपत्र अबस्थामा रहेको बताए । उनले निर्माण व्यवसायीलाई पटक पटक ताकेता गर्दा पनि समयमा काम हुन नसकेको जनाकारी दिए । कार्यालयवाट ताकेता गर्दाको समयमा काम शुरु गरे जस्तो गर्ने र म्याद थपेपछि सम्पर्कमा नै आउन नखोज्ने बताए । उनले निर्माण व्यवसायीले समयमै काम सम्पन्न गर्न नसकेपछि कार्यालयले पटकपटक बैंक ग्यारेन्टी तान्नका लागि पत्र समेत काटेको बताए । यसपटक पनि काम सम्पन्न नगरेको खण्डमा ठेक्का सम्झौता तोड्ने कार्यालयले बताएको छ । लामो समयदेखि सडक निर्माणको काम अलपत्र परेपछि त्यस क्षेत्रका नागरिकहरू आक्रोषित बनेका छन । समयमै सडक निर्माण नहुँदा उक्त सडकबाट तम्घासहुँदै, धुर्कोट र मदाने गाउँपालिका जाने नागरिकहरू थप समस्यामा पर्दै आएका छन ।