खोज

चन्द्रौटा (कपिलवस्तु), ३ असोज ।

ट्राफिक प्रहरीले सवारी चेकजाँच स्थलमै प्रशिक्षण अभियान चलाएको छ । पछिल्लो समय चलाक लापरवाहीका कारण सवारी दुर्घटना बढ्दै गएपछि प्रहरीले सो अभियान चलाएको हो । जिल्ला ट्राफिक प्रहरी कार्यालय कपिलवस्तका अनुसार सवारी नियम उल्लंघन गर्ने चालक, सर्वसाधारणलाई चेकिङ स्थलमा जम्मा गरी सवारी दुर्घटना सम्वन्धी प्रशिक्षण दिने गरिएको छ ।

जिल्ला ट्राफिक प्रहरी कार्यालय कपिलवस्तुका प्रहरी निरीक्षक अनिष भण्डारीले जरीवाना मात्र गर्दा सवारी चालक सचेत नहुने भएकोले प्रशिक्षणको अभियान सुरु गरेको बताए । चेकिङ स्थलमा १५ देखि २० जना जम्मा भए पछि ५ देखि १० मिनेट सम्म प्रशिक्षण सहितको छलफल गर्दै आएको उनको भनाई छ । प्रहरी निरीक्षक भण्डारीका अनुसार जिल्लामा साउन र भदौ महिनामा ३ हजार ६ सय २५ जना सवारी चालकलाई प्रशिक्षण गरिएको ट्राफिक प्रहरीले जनाएको छ । आठ ओटा युनिट मार्फत ९१ पटक सवारी चेकजाँच स्थलमा प्रशिक्षण दिइएको थियो ।

पूर्व–पश्चिम राजमार्ग, हुलाकी राजमार्ग र बजार क्षेत्र जोड्ने मुख्यमार्गमा चेकजाँच सँगै प्रशिक्षण दिएको जिल्ला ट्राफिक प्रहरी कार्यालयले जनाएको छ । सार्वजनिक बसमा यात्रा गर्ने यात्रुसँग सोधपुछ गर्ने, सवारी चालक, सहचालक यात्रुहरुलाई सवारी नियम तथा दुर्घटनाको जोखिम कम गर्ने उपायहरु जानकारी दिने अस्थायी ट्राफिक प्रहरी कार्यालय चन्द्रौटाका प्रहरी सहायक निरीक्षक हुमनाथ पौडेलले बताए । अटो चालक हरि थारुले ट्राफिक प्रहरीले चलाएको अभियान सकारात्मक रहेको बताउँछन् ।