खोज

सुनवल, ३० भदौ ।

हरेक वर्ष जस्तै यसवर्ष पनि पश्चिम नवलपरासीको सुनवल ११ केरवानीमा रहेको बाबा बर्दगोरीया मन्दिरमा आइतबारबाट तीज मेला सुरु हुदै छ । आइतबार दर खाने दिन र सोमबार हरितालिका तीजको दिन गरी दुई दिन सम्म मेला चल्ने छ ।

मेलाको आवश्यक तयारी पूरा भएको बाबा बर्दगोरीया धाम विकास संस्थाका सचिव लेखनाथ ढकालले जानकारी दिए । श्रद्धालुहरुको धेरै भिड हुने भएकाले मेला व्यवस्थापनका लागि विभिन्न १२ उपसमिति बनाएर तयारी भइरहेको छ । मेलामा बाल उद्यान सहितको रमाईलो मेला, कुस्ती प्रतियोगिता लगायतका आकर्षण रहेका छन् । मेलामा ५ लाख बढी श्रद्धालु सहभागी हुने अनुमान गरिएको छ । मेलामा सवारी साधनको व्यापक भिड हुने भएकाले पार्किङ्ग व्यवस्थापनका लागि टेन्डर नै आह्वान गरिएको थियो । सोही अनुरुप १ लाख १६ हजार ७ सय ५० रुपैयाँमा सवारी पार्किङ्ग टेन्डर स्वीकृत भएको सचिव ढकालले जानकारी दिए ।

धाम विकास संस्थाले आइतबार र सोमबार मेलाका लागि हुने भिडभाडलाई मध्यनजर गर्दै भुमही चोकदेखि मन्दिरसम्म र सुनवल १३ बडेरा देखि मन्दिर जाने सडकमा कुनै पनि पार्किङ्ग, ठेला पसल व्यवस्था नगर्न अनुरोध गरेको छ । बढी भिडभाड हुने भएकाले सवारी साधन पार्किङ्गका लागि बाबा बर्दगोरीया आधारभूत विद्यालय र हिरागंजको उत्तरतर्फ जंगलमा व्यवस्था गरिएको छ । मेलामा नवलपरासी सहित छिमेकी जिल्ला र भारतबाट समेत मानिसहरु आउने गर्दछन् ।

धार्मिक तथा पर्यटकीय आस्थाको केन्द्र रहेको शिवभक्त नन्दीकेश्वरको तपोभूमिका नामले परिचित बाबा बर्दगोरीया धाममा दाहिनेतर्फ पानभार खोला र बायाँतर्फ भूमही खोला रहेका छन् । उक्त क्षेत्रमा मामीसती सवरिया मन्दिर र अमरपोखरी ताल छ । यही मन्दिरसँग जोडिएको अर्को मन्दिर हो मामीसती सबरिया मन्दिर । बाबा बर्दगोरीया र मामीसती सवरिया, दुवै नाम सुन्दा फरक भए पनि यी दुवै मन्दिरको इतिहास एउटै रहेको स्थानीय बताउँछन् । बाबा बर्दगोरीया मन्दिर परिसरमा एतिहासिक तथा पुरातात्विक महत्वका विभिन्न भग्नावशेष भेटिएपछि पुरातत्व विभागको टोलीले केही महिना अगाडि उत्खनन् समेत गरेको थियो ।