खोज

बुटवल, ३० भदौ ।

पश्चिमाञ्चल यातायात व्यवसायी समिति बुटवलले सामुदायिक विद्यालयमा अध्ययनरत १९ जना विद्यार्थीलाई जनही १० हजारका दरले छात्रवृत्ति प्रदान गरेको छ ।

समितिका पूर्व अध्यक्ष अर्जुन रानाभाट, कोषाध्यक्ष लालबहादुर श्रेष्ठ र पूर्व अध्यक्ष गणेश पन्थले आफूले पाउने पारिश्रमिकलाई सामाजिक काममा लगाउने गरी स्थापना गरेको कल्याणकारी कोषबाट विद्यार्थीलाई छात्रवृत्ति वितरण गरिएको हो । विभिन्न सामुदायिक विद्यालयका १९ जना विद्यार्थीलाई १० हजारका दरले गरीव तथा जेहेन्दार छात्रवृत्ति प्रदान गरिएको कार्यक्रम संयोजक तथा पश्चिमाञ्चल यातायात व्यवसायी समिति बुटवलका वरिष्ठ उपाध्यक्ष प्रतापबहादुर कार्कीले बताए ।

रुपन्देही, कपिलवस्तु, नवलपरासी, अर्घाखाँची, नवलपुर र स्याङ्जाका केही सामुदायिक विद्यालयका विद्यार्थीलाई छात्रवृत्ति प्रदान गरिएको हो । समितिले स्थापना गरेको अक्ष्यकोषको व्याजबाट विद्यार्थीलाई छात्रवृत्ति वितरण गरेको हो ।

कार्यक्रममा बोल्दै नेपाल यातायात व्यवसायी महासंघका पूर्व अध्यक्ष अर्जुन रानाभाटले सानो सहयोगले पनि विद्यार्थीलाई पढ्नका लागि हौसला बढ्ने हुँदा आफूले पाउने पारिश्रमिकलाई अक्षयकोष बनाईदिएको र यसलाई बढाउँदै निरन्तरता दिनुपर्ने बताए । यातायात व्यवसायीले राज्यलाई ठूलो सहयोग गर्दै आएको बताउंदै राज्यले यातायात व्यवसायीका समस्यामा गम्भीर हुन नसकेको गुनासो गरे । समितिका पूर्व अध्यक्ष तथा नेपाल यातायात व्यवसायी महासंघका वरिष्ठ उपाध्यक्ष लोकराज पोखरेलले रक्तदान र छात्रवृत्ति कार्यक्रमलाई निरनतरता दिनुपर्ने बताउँदै छात्रवृत्तिको रकम शिक्षामा नै प्रयोग गर्न आग्रह गरेका छन् । पश्चिमाञ्चल यातायात व्यवसायी समिति बुटवलका अध्यक्ष यमप्रसाद पाण्डेले छात्रवृत्ति र रक्तदान कार्यक्रमलाई थप व्यवस्थित गरी निरन्तरता दिने प्रतिवद्धता जनाउँंदै यातायात व्यवसायीका समस्या सरकारले सम्बोधन नगर्दा व्यवसायी समस्यामा परेको भन्दै चिन्ता व्यक्त गरे ।

कार्यक्रममा समितिका पूर्व अध्यक्ष गुप्तबहादुर केसी, पूर्व महासचिव तथा ढुवानी व्यवसायी समितिका अध्यक्ष जीतबहादुर भाट क्षेत्री, समितिका उपाध्यक्ष गणेश घिमिरे, प्रतापबहादुर कार्की, महासचिव हरिप्रसाद कंडेल, दुर्गादत्त माध्यमिक विद्यालय शंकरनगरका प्रअ चण्डीप्रसाद पाण्डेलगायतले समितिले शैक्षिक क्षेत्रमा टेवा पु¥याउने गरी अक्षकोष स्थापना गरेर विद्यार्थीलाई हौसला प्रदान गरेकोमा सराहना व्यक्त गरे ।

त्यस्तै समितिले आयोजना गरेको रक्तदान कार्यक्रममा ३५ युनिट रगत संकलन भएको महासचिव हरि प्रसाद कंडेलले बताए । सोही समारोहमा लु २ ख ११९६ का चालकको दुर्घटनामा परी मृत्यु भएकोमा उनको परिवारलाई समितिले गरिदिएको विमावाट ३ लाख रुपैयाँ प्रदान गरिएको थियो ।