खोज

नवलपुर, २९ भदौ ।

पुर्वी नवलपरासीमा पर्ने कालीगण्डकी करिडोर खण्डमा शुक्रबारदेखि रातिको समयमा गाडी सञ्चालनमा प्रहरीले रोक लगाएको छ । सो सडक निर्माणका क्रममा रहेकाले करिडोर खण्डमा रातिको समयमा गाडी सञ्चालनमा रोक लगाइएको जिल्ला प्रहरी कार्यालयले जनाएको छ ।

जिल्ला प्रहरी कार्यालय नवलपरासी पूर्वका अनुसार करिडोर निर्माणको काम सम्पन्न भइ नसकेकाले र नजिककिएको चाडपर्वमा हुने अप्रत्याशित दुर्घटनाको जोखिम बढ्ने भएका कारण रातिको समयमा गाडी सञ्चालनमा रोक लगाइएको हो ।

कालीगण्डकी करिडोर नवलपरासी पुर्व खण्ड ८७ किलोमिटर लामो रहेको छ र यहाँ अझै २० प्रतिशत काम नसकिएको आयोजनाको भनाई छ । नवलपरासी पुर्वमा कालीगण्डकी सडक लामो भएकाले र यसमा लामो बाटो जंगल क्षेत्रमा पर्ने र धेरै ठाउँमा फोन सम्पर्क समेत हुन नसक्ने भएकाले राति दुर्घटना भए उद्दारमा समेत समस्या पर्ने हुँदा यसले जोखिम समेत धेरै बढाउन सक्ने भएकाले गाडी सञ्चालनमा रोक लगाइएको जिल्ला प्रहरी कार्यालय नवलपरासी पुर्वले जनाएको छ ।

“करिडोर निर्माणको चरणमा रहेकाले यो अझै निर्माण पूरा भएको छैन”–करिडोरको निर्माण ठेक्का लिएको गौली गुु्रपका ठेकेदार कपिल शर्माले भने । “करिडोरमा रातीको समयमा सवारी साधन चलाउँदा दुर्घटनाको जोखिम बढाएको छ, राति उद्दारमा पनि कठिनाइ हुने गरेको छ”, उनले भने । सञ्चारको पहुँच कम भएका क्षेत्रमा आवश्यक मात्रामा टावर जडान गर्ने विषयमा नेपाल टेलिकमसँग समन्वय भइरहेको प्रहरी उपरीक्षक नरहरि रेग्मीले बताए । सञ्चारको पहुँच र करिडोर निर्माण सम्पन्न भएपछि मात्रै राति गाडी सञ्चालन गरिने उनले बताए ।

निर्माणाधीन कालीगण्डकी करिडोरको नवलपुर खण्डमा करिब ८० प्रतिशत काम सम्पन्न भइसकेको छ । नवलपुरमा रहेको कालीगण्डकी करिडोरबाट जिल्लाका पहाडी क्षेत्रका लागि साना गाडी सञ्चालन हुने गर्छन् ।

यसबाहेक तनहुँका विभिन्न क्षेत्र, पाल्पा, स्याङ्जा र पोखराका लागि समेत गाडी सञ्चालन हुने गरेका छन् । नारायणगढ–गैडाकोट हुँदै यस खण्डबाट विभिन्न क्षेत्रका लागि गाडी सञ्चालन हुने गरेका छन् ।