खोज

 बुटवल, २५ भदौ ।  नेपाँली काग्रेस, केन्द्रीय निर्वाचन समितिले भदौ १९ गते पार्टीको जिल्ला कार्यसमितिहरुलाई निर्वाचन हुन बाँकी तह, पद र संख्या यकिन गर्ने, निर्वाचन क्यालेन्डर बनाउने र प्रक्रिया अघि बढाउन भनी पत्र पठाएर निर्देशन गरेको छ । केन्द्रीय बैठकले असोज २९ गतेभित्र निर्वाचन हुन बाँकी तहहरु, विधान अनुसार रिक्त पदहरुमा निर्वाचन गर्नका लागि आवश्यक तयारी गर्न निर्देशन गरेको हो ।

‘१४ औं महाधिवेशन अन्तर्गत महासमिति सदस्य, प्रदेश सम्मेलन सदस्य, वडा, पालिका, प्रदेश सभा क्षेत्र र प्रतिनिधि सभा क्षेत्रीय कार्यसमिति मध्ये कुनै तह र पदको निर्वाचन हुन बाँकी भएको वा विधानअनुसार रिक्त हुन गएको भएमा उक्त पदको निर्वाचन असोज २९ गतेभित्र अनिवार्य सम्पन्न गर्न अनुरोध गरिन्छ ।’ केन्द्रीय निर्वाचन समितिका सचिव जगन्नाथ श्रेष्ठले पठाएको पत्रमा उल्लेख छ । योसंगै उम्मेदवारको चर्चा शुरु भएको छ ।

रुपन्देही क्षेत्र नं २ मा क्षेत्रिय सभापति हरि लम्सालले राजीनामा दिएपछि पद रिक्त थियो । स्थानीय निर्वाचनमा नगरप्रमुखका उम्मेदवारका आकांक्षी रहेका लम्साल टिकट नपाएपछि राजीनामा दिएका थिए । सो पदमा उपसभापति परशुराम ढकाल कार्यवाहक थिए । लम्साल अहिले साधारण सदस्य समेत छैनन् । स्थानीय निर्वाचनको कठिन परिस्थितिमा कार्यबाहक बनेर समस्या पार लगाएका ढकाल पार्टीभित्र सहमति भएमा पुरा समय सभापति बन्न तयार रहेको बताउँछन् । ‘काठमाण्डौमा भएकाले पत्र बुझिसके अब जिल्ला फर्किएर आवश्यक छलफल गर्ने छु ।’— उनले भने । कार्यवाहक सभापति परशुराम ढकाल प्रदेश २ (क) का सभापति समेत भएकाले प्राविधिक रुपमा उम्मेदवार बन्दा यो पदबाट राजीनामा दिनुपर्ने हुन्छ । चार वर्षे कार्यकालमध्ये कार्यबाहक सभापति बनेर करीब दुई वर्षको अवधिमा धेरै काम गर्न सफल भएको भन्दै यो भूमिकालाई उचित मूल्यांकन गर्दै अब बाँकी कार्यकालमा आफुलाई सहमतिमा दिदा राम्रो हुने उनको तर्क छ ।

संस्थापन समूहका हालका सचिव प्रजापाल गिरी अहिले सभापतिको उम्मेदवारका रुपमा हेरिएका छन् । युवाहरुको माझ लोकप्रिय भएका कारण पनि उनलाई नेतृत्वमा ल्याउने सोच रहेको युवाहरुको बताउँछन् । नितान्त राजनीतिक संस्कारमा रमाएका उनी पार्टीको हरेक भूमिकालाई निभाउँदै आएका छन् । केन्द्रीय निर्वाचन समितिको आधिकारीक पत्र जिल्लामा नआईसकेको भन्दै उनले पत्र प्राप्त भएपनि आवश्यक प्रक्रिया अघि बढ्ने बताए । जिल्ला समितिको बैठक बसेर आवश्यक मिति तय गर्ने र उम्मेदवारीबारे छलफल हुने उनले बताए । रिक्त भएको पदमा ६ महिनाभित्र पदपुर्ति गर्ने भनिएको उनले बताए । पार्टीले पदपुर्ति गर्दा निर्वाचित प्रणाली अवलम्बन गरेको भन्दै निर्वाचनको बारेमा वृहत छलफल गरिने उनले बताए ।

पार्टीभित्र पद छोड्न नखोज्ने प्रवृति हाबी रहेको यसअघि सभापति उठ्ने चर्चामा रहेका काजिमान श्रेष्ठले दुखेसो गरे । आफु यसपटक उम्मेदवारीको तयारीमा नरहेको स्पष्ट पार्दै छलफल गरी सहमतिमा उम्मेदवार बनाउने उनले बताए । ‘सहमतिमा जाँदा राम्रो हुन्छ ।’—उनले भने । नेपाल टे«ड युनियन काँग्रेस लुम्बिनी प्रदेशका अध्यक्ष सहित धेरै सामाजिक संघसंस्थामा रहेकाले पनि आफु अहिले निर्वाचनमा जाने मनसाय नबनाएको उनले बताए । यस हिसाबबाट हेर्दा कार्यबाहक सभापति नै बलियो दाबेदार देखिएपनि अन्तमा पार्टी भित्र हुने गुठको प्रभाव अन्तिममा निर्णायक हुने देखिन्छ । कांग्रेसले आउँदो मंसिरमा महासमिति बैठक गर्दैछ । त्यसअघि बाँकी रहेका तहमा अधिवेशन गर्न लागेको हो ।