खोज

बुटवल, २६ भदौ ।

नेपाली कांग्रेस बुटवल उपमहानगरपालिका वडा नं ४ ले तीज मिलन कार्यक्रम सम्पन्न गरेको छ । पार्टीनिकट महिलाहरुलाई सहभागी गराएर काँग्रेसले तीज मिलन तथा दर खुवाउने कार्यक्रम आयोजना गरेको हो ।

कार्यक्रममा बुटवल उपमहानगरपालिकाका नगर प्रमुख तथा नेपाली कांग्रेस बुटवल उपमहानगरपालिकाका सभापति खेलराज पाण्डेले नगरपालिकामा कांग्रेसले जितेपछि महिलाहरूलाई आत्मनिर्भर बनाउने योजना अगाडि बढाएको बताए ।

उज्यालो बुटवल, हरियाली बुटवल, स्वच्छ र समृद्ध बुटवल निर्माण गर्ने योजना अगाडि बढाएको भन्दै नगर प्रमुख पाण्डेले बुटवलका पुर्ब नगर प्रमुख सुर्य प्रसाद प्रधानले सुरु गरेको आम्दा अस्पतालको स्तरवृद्वि गरी ३०० बेडमा लैजाने योजना अगाडि बढेको भन्दै उनले त्यसका अलावा, आमा सुरक्षा कार्यक्रम, पोषण भत्ता, निःशुल्क भिडियो एक्सरे सेवा लगायतका काम सुरु भएको जानकारी गराए ।

नेपाली कांग्रेस बुटवल उपमहानगरपालिका वडा नं. ४ का सभापति अरूणकुमार श्रेष्ठले महिलाहरुका बीचमा आत्मियता कायम गर्न र मुलुकको संस्कृतिलाई जोगाइराख्न तीज मिलन कार्यक्रम गरिएको भन्दै महिलाहरू सचेत भए राजनीति पनि राम्रो हुने बताए । कार्यक्रममा नेपाली कांग्रेस लुम्बिनी प्रदेश सदस्य सविता शाक्य, नेपाली कांग्रेस जिल्ला सचिव परमानन्द भट्टराई, नेपाली कांग्रेस क्षेत्र नं. २ क्षेत्रीय सचिव विमलराज भट्टराई, बुटवल उपमहानगरपालिका वडा नं. ४ का वडा अध्यक्ष नरिश्वर शर्मा पौडेल लगायतले बोल्दै मुलुक आर्थिक संकटमा रहेको अवस्थामा तडकभडक नगरी जे छ त्यसैमा रमाएर चाडपर्व मनाउनुपर्नेमा जोड दिए ।

सो अवसरमा महिलाहरूलाई तीजको दर खुवाउनुका साथै तीजका गीतमा नाचेर मनोरञ्जन लिएको नेपाली कांग्रेस बुटवल उपमहानगरपालिका वडा नं ४ कि सचिव पवि श्रेष्ठले जानकारी दिइन् ।