खोज

पोखरा, २५ भदौ । पोखरा—मुग्लिन सडक निर्माणको काम ढिलाई भएको छ । सडक क्षेत्रमा भएका पाइप बिस्तार, विद्युत् पोल स्थानान्तरण, टेलिफोनका तारहको व्यवस्थापन, सिँचाइ लगायतका काममा सरोकारवाला कार्यालयहरुसंग समन्वय नहुदा निर्माण ढिलाई भएको निर्माण कम्पनीको गुनासो छ । ठेक्का अवधिको एक वर्ष बित्नै लाग्दा पृथ्वीराजमार्ग (मुग्लिन–पोखरा) सडकको हालसम्मको प्रगति दुई प्रतिशतको हाराहारी छ । चार लेन विस्तारका लागि दुई प्याकेजमा ठेक्का सम्झौता भएकामा एउटामा प्रगति एक प्रतिशत र अर्काेमा तीन दशमलव पाँच प्रतिशत छ । ६७ प्रतिशत समय व्यतीत हुँदा आयोजनाको पश्चिम खण्डमा प्रगति ९ प्रतिशतमात्र देखिएको छ ।

पोखरा महानगरपालिकाको समन्वयमा आइतबार आयोजना अन्तर्गत पोखरा खण्डको कार्य प्रगतिका सम्बन्धमा समीक्षात्मक बैठकमा प्रमुख जिल्ला अधिकारी वासुदेव घिमिरेले कास्कीको लाइफ लाइनको रुपमा रहेको सडक निर्माणमा तिब्रता ल्याउन निर्देशन दिए । कुनै पनि बाहानामा कोही पनि जिम्मेवारीबाट पन्छने, आरोप र प्रत्यारोप गरी ढिलासुस्ती गर्ने कार्यलाई स्वीकार्य नहुने उनले बताए । तत्काल समस्याको पहिचान गरी सम्बन्धित सरोकारवाला निकायले यथाशीघ्र निर्माण कार्यमा सहजीकरण गर्न उनले निर्देशन दिए । सडक आयोजनाको परामर्शदाता र निर्माण कम्पनीका प्रतिनिधिले आयोजना निर्माण स्थलमा खानेपानीको पाइप विस्तार, विद्युत् पोलहरु स्थानान्तरण, टेलिफोनका तारहरुको व्यवस्थापन, सिँचाइका कार्यहरू समयमा नभएका कारण निर्माण कार्य ढिलाइ भइरहेको बताएका छन् । सरोकारवाला निकायले भने आआफ्नो क्षेत्रबाट काम गरिरहेको बताएका छन् ।

स्थानीय अवरोध हटाउन पोखरा महानगरपालिका प्रतिबद्ध रहेको प्रमुख धनराज आचार्यले बताए । कतिपय अवस्थामा समस्या देखाएरमात्र समस्याको समाधान नहुने भन्दै उनले निर्माण कार्यलाई अघि बढाउन निर्माण व्यवसायीलाई आग्रह गरे । कोत्रेदेखि सेती पुलसम्म सडकमा परेका खाल्डाखुल्डी १ साताभित्र पुर्न उनले निर्देशन दिए ।

सेती पुलको निर्माण कम्पनी रसुवा कन्स्ट्रक्सनका सञ्चालक सुदर्शन देवकोटाले स्थानीय अवरोध हटाए आफूले तोकिएको समय सीमा भित्रै पुल निर्माण कार्य सम्पन्न गर्ने प्रतिबद्धता जाहेर गरेका छन् ।

कार्यक्रममा जिल्ला प्रशासन कार्यालय कास्कीका प्रमुख वासुदेव घिमिरे, सडक क्षेत्रमा पर्ने वडा नं.१० का वडा अध्यक्ष राजेश गुरुङ, १२ का वडा अध्यक्ष सन्तोष बास्तोला, १४ का वडा अध्यक्ष बोधबहादुर कार्की, २६ का अध्यक्ष नरेन्द्र थापा, २७ का अध्यक्ष पूर्णकुमार गुरुङ, २९ का अध्यक्ष श्रीप्रसाद गुरुङ, ३० का अध्यक्ष दुर्गाप्रसाद सुवेदी, ३२ का अध्यक्ष अक्कलबहादुर कार्कीले आयोजना निर्माण कार्यलाई तत्काल अघि बढाई सडकको दुरावस्थाको अन्त्य गर्नुपर्ने बताए ।

योजनाको लागत १३ दशमलव ६२ अर्ब छ भने योजनाको अवधि आव २०८५/८६ सम्म रहेको छ । मुग्लिन–पोखरा सडक योजना (पूर्वी खण्ड) अर्थात आबुखैरेनीबाट–जामुने भज्याङसम्मको निर्माणको ठेक्का चाइना कम्युनिकेशन कम्पनी लिमिटेडलाई दिइएको थियो । सो ठेक्काको सम्झौता विसं २०७८ वैशाख २ गते भएको थियो । कूल ४१ दशमलव ४५ किमीमध्ये एक दशमलव ५२ किमी सहरी क्षेत्र र गैर सहरी क्षेत्रमा ३९ दशमलव ९३ किमी छ ।