खोज

बुटवल, २४ भदौ ।  क्रान्तिकारी कम्युनिष्ट पार्टी नेपालका प्रवक्ता धमेन्द्र बास्तोलाले समाजवादी मोर्चा औचित्यहीन गठबन्धन भएकाले पतनको बाटोमा रहेको बताएका छन् ।
आइतबार बुटवलमा पार्टीले आयोजना गरेको पत्रकार सम्मेलनमा प्रवक्ता बास्तोलाले उक्त मोर्चा संसदवादलाई संस्थागत गर्न मात्रै प्रयोग भएकाले छिटै पतन हुने दावी गरे ।
आगामी चुनावसम्म यो मोर्चा कायम रहेर चुनावमा गए एक सिट पनि नजित्ने उनको दावी छ ।
यो मोर्चा पतनको बाटोमा छ,चुनावमा गए एक सिट पनि जित्दैन भनेर प्रचण्डलाई पनि भनिदिएको बास्तोलाले बताए ।
प्रवक्ता बास्तोलाले अहिलेको संसदीय व्यवस्थामा नेत्रविक्रम चन्द विप्लव प्रधानमन्त्री भएको खण्डमा प्रचण्ड भन्दा पनि खराब भएर निस्कने आरोप लगाए ।
नेता बास्तोलाले राष्ट्रिय स्वतन्त्र पार्टी लगायत नयां दलहरुले पनि देश चलाउन नसक्ने बताए । उक्त पार्टीका अध्यक्ष रवि लामिछानेमाथि अमेरिकामा रहंदा बैंक ठगी लगायत थुप्रै मुद्दा रहेको जिकिर गर्दैै बास्तोलाले उनी नेतृत्वको पार्टी देशका समस्याहरुको समाधान नभएको बताए ।
मुलुकमा भ्रष्टाचार नीगित र संस्थागत भएकाले अहिलेको संविधान र कानून नबदलेसम्म ठूला भ्रष्टाचारमा कोही पनि कारवाहीमा नपर्ने उनको तर्क छ ।
केही दिन अघि चिनिया राष्ट्रपतिले दिएको अभिव्यक्तिको शैली सही नभएपनि सारमा उनको भनाई सही भएको बास्तोलाले टिप्पणी गरे । उनले नेकपा वहुमत र नेपाल कम्युनिष्ट पार्टी क्रान्तिकारी माओवादी एकता भएर क्रान्तिकारी कम्युनिष्ट पार्टी गठन भएको र आफूहरुले सच्चा कम्युनिष्ट पार्टीहरुलाई एकतावद्ध गर्दै जाने बताए । कम्युनिष्टहरुको एकता भए नेपालमा दुई तिहाई वहुमत आउने उनको भनाई छ ।