खोज

बुटवल,१९ भदौ । नेकपा एमाले लुम्बिनीको प्रथम अधिवेशन अन्तर्गत नेतृत्व चयन गर्न अन्ततः मतदान शुरु भएको छ । बुटवलको अन्तराष्ट्रिय सम्मेलन केन्द्रमा भर्खरैबाट मतदान शुरु भएको निर्वाचन समितिका प्रमुख हरिप्रसाद भण्डारीले जानकारी दिए ।

भदौ १६ र १७ गतेका लागि तय भएको अधिवेशन नेतृत्व चयनमा सहमति जुटाउन प्रयास गर्दा दुई दिन लम्बिएको थियो । उद्घाटन समारोह र बन्द सत्रमा पार्टीका शीर्ष नेताहरुले पार्टीभित्र गुट नरहेकाले सर्वसम्मत नेतृत्व चयन गरेर अन्य ६ वटा प्रदेशलाई एकताको सन्देश दिन आग्रह गरेपनि व्यवहारमा लागु भएन । प्रदेश अध्यक्षमा पाल्पाका राधाकृष्ण कंडेल र प्युठानका हरि प्रसाद रिजालले अडान नछाड्दा सहमति हुन नसकेपछि मतदानबाट नेतृत्व चयन हुने भएको हो ।

यसअघि सोमबार सांझदेखि शुरु गर्ने भनिएको मतदान अन्तिम समयमा राति १० बजे स्थगित भएको थियो । सर्वसम्मतको प्रयास असफल भएपछि अध्यक्षका उम्मेदवारहरु कंडेल र रिजालले पदाधिकारीमा प्यानल नै बनाएर निर्वाचनमा गएका हुन् । कंडेल एक वर्ष अघि प्रदेश संगठन कमिटीको अध्यक्ष मनोनित भएका थिए । उनले आफूले एक वर्ष मात्र काम गर्न पाएकाले एक कार्यकाल निर्वाचित अध्यक्ष भएर पार्टीलाई प्रदेशमा पहिलो पार्टी बनाउन उम्मेदवारी दिएको बताएका छन् । अर्का उम्मेदवार रिजाल प्रदेश सरकारका पुर्व मन्त्री र पार्टी केन्द्रीय सदस्य हुन् । उनलाई महासचिव शंकर पोखरेल निकटका प्रदेशका नेताहरु भूमिश्वर ढकाल,चेतनारायाण आचार्य,बलराम अधिकारी,शिवराज सुवेदी लगायतको जोडबलमा कंडेललाई रोक्न अघि सारेका हुन् । कंडेललाई उपाध्यक्ष विष्णु पौडेल, पुर्व मुख्यमन्त्री लिला गिरी, गोकर्ण विष्ट,बैजनाथ चौधरी,ठाकुर गैरे,बासुदेव घिमिरे लगायतका नेताहरुको समर्थन छ ।
उपाध्यक्षमा रुपन्देहीका भोजप्रसाद श्रेष्ठ र विश्वराज बराल अनुप, बाँकेका पुजन विश्वकर्मा र रोल्पाका शान्तकुमार वली छन् ।
श्रेष्ठ कंडेल र बराल रिजाल प्यानलका हुन् भने विश्वकर्मा र वली प्यानल बाहिरबाट उम्मेदवारी दिएका छन् । सचिवमा दाङका लक्ष्मण आचार्य निर्विरोध भएका छन् । आचार्य कंडेल र रिजाल दुबै प्यानलका उम्मेदवार थिए । तर उनको समर्थन कंडेल पक्षलाई देखिएको छ ।
उपसचिव पुरुषतर्फ एक पदका लागि रुकुम पूर्वका उपेन्द्रलाल कामी, रोल्पाका पूर्ण बुढामगर र बाँकेका दुर्गाप्रसाद थारु ९चौधरी० छन् । त्यस्तै उपसचिव महिला तर्फ एक पदका लागि बाँकेकी आरती पौडेल, बसन्ती अधिकारी र बर्दियाकी लिला राना मगर छन् । चौधरी र राना कंडेल प्यानलका हुन् भने बुढामगर र अधिकारी रिजाल प्यानलका हुन् । कामी र पौडेलले प्यानल बाहिरबाट उम्मेदवारी दिएका छन् ।
२ सय जना सदस्यका लागि ३ सय ५ जनाले उम्मेदवारी दिएका छन् ।
सात प्रदेश मध्ये पहिलो अधिवेशनमै पार्टी उपाध्यक्ष विष्णु पौडेल र महासचिव शंकर पोखरेल निकटका नेताहरुले गुट बनाएर चुनावी प्रतिस्पर्धा गरेपछि अन्य ६ प्रदेशमा हुने अधिवेशनमा पनि यसको प्रभाव र असर पर्ने देखिएको छ ।