खोज

पाल्पा, १९ भदौ

निर्माण व्यवसायीले १० वर्ष हुँदा सम्म योजनाका काम पूर्णरुपमा सम्पन्न नगरी अलपत्र छाडेपछि सडक डिभिजन कार्यालय पाल्पाले सम्झौता तोडी, धरौटी जफत गर्दै कालो सुचीमा राख्ने काममा जुटेको छ । निर्माण व्यवसायीलाई कार्यालयले पटक पटक ताकेता गर्ने, लिखित, मौखिक, इमेल तथा रजिष्ट्रि पत्र पठाएर काममा ताकेता गरेपनि समयमा काम सम्पन्न नगर्ने, निर्माण व्यवसायीलाई डिभिजन सडक कार्यालय पाल्पाले ठेक्का सम्झौता तोड्न लागेको हो ।

सडक डिभिजन कार्यालय पाल्पाले १० बर्ष सम्म पनि योजना पूरा नगरेका निर्माण व्यवसायीहरुको ठेका रद्द गर्ने पक्रिया थालेको छ । कान्छाराम जयबावा गोरखा जे.भि. काठमाडौं, कोशी एण्ड न्यौपाने ओम साई कन्स्ट्रक्सन जे.भी. काठमाडौले समयमा काम नगरेपछि डिभिजन सडक कार्यालयले ठेक्का तोड्ने भएको छ । कार्यालयले पटक पटक म्याद थपे पनि सो अवधिमा समेत काम पूरा गर्न सकेन । जसको कारण माडी फाँट वरीपरीका ४ पालिकाका जनता सहज यातायाताको सुविधाबाट बञ्चित भएका छन् ।

सिद्धार्थ राजामार्गको तानसेन–बुटवल सडक खण्डको जरेपिपल खण्ड, आर्यभञ्ज्याङ्ग–रामपुर सडकखण्ड र तानसेन–बुटवल सडकखण्डको डुम्रे क्षेत्रमा मर्मतको मर्मतको लागि जयरक्तकाली कन्स्ट्रक्सन प्रा.लि. नुवाकोट, आर्यभञ्ज्याङ्ग–रामपुर सडकखण्डमा मर्मतको लागि उदय कन्स्ट्रक्सन एण्ड इन्जिनियरिङ्ग कन्सल्टेन्सी तानसेन पाल्पा, रिडी–तम्घास क्षेत्रममा सडक मर्मतको जिम्मेवारी लिएको रिदम कन्स्ट्रक्सन बुटवल रुपन्देही, झुम्सा राम्दी सडकखण्ड मर्मतको जिम्मा लिएको नमुना कन्स्ट्रक्सन खिम्ती प्रा.लि. रामेछाप, सिद्धार्थ राजमार्गको तानसेन–बुटवल सडक खण्डको झुम्सा क्षेत्रमा मर्मत सम्भारको लागि जिम्मा लिएको चण्डी निर्माण सेवा सिद्धार्थनगर रुपन्देही, कालीगण्डकी नदीमा गुल्मी रिडी र स्याङ्जा चण्डीभञ्ज्याङ्ग जोड्ने स्टिल ट्रस पुल निर्माणको ठेक्का सम्झौता गरेको श्री स्वच्छन्द निर्माण सेवा नागार्जुन काठमाडौ लगायतका १० वटै निर्माण व्यवसायीहरुले समयमा काम नगरेकोेले सम्झौता रद्द गर्न विभागमा पत्राचार गरिसकेको छ सडक डिभिजन कार्यालय पाल्पाका डिभिजन प्रमुख प्रदिपमणी निरौलाले बताए ।

एउटै निर्माण व्यवसायीलाई सरकारले धेरै ठेक्का दिने, राजनीतिक दलको पहँुचको आधारमा काम नगर्ने निर्माण व्यवसायीलाई कारवाही गर्न नसक्ने, सार्वजनिक खरिद ऐन व्यावहारिक नभएको कारण पनि योजनाका कामहरु समयमा सम्पन्न भएका छैनन् । जसका कारण नागरिकहरुले विकासका काममा अवरोध झेल्दै आएका छन् ।