खोज

सुनवल, १७ भदौ ।

पश्चिम नवलपरासीका धार्मिक संघ संगठनहरुले जिल्लामा कुनै पनि धार्मिक घटना हुन नदिनका लागि सहकार्यसहितको सामुहिक प्रतिबद्धता जनाएका छन् । धर्मका नाउँमा केही उच्छृङ्खल व्यक्ति र समुहले अवाञ्छित गतिविधिहरु गर्न सक्ने संभावना महशुस हुन थालेपछि जिल्ला प्रशासन कार्यालयको अगुवाईमा आइतबार बिहान परासीमा धार्मिक संघ संगठनहरुको बैठक बसेको हो ।

विश्व हिन्दु महासंघ, विश्व हिन्दु परिषद्, इसाई समाज र मुस्लिम संघका धार्मिक अगुवाहरुको बैठकले धार्मिक सहिष्णुता र सामाजिक सद्भाव खल्बलाउने व्यक्ति र समुहप्रति विशेष सजग भई आ–आफ्ना धार्मिक कार्यक्रम सञ्चालन गर्ने निर्णय गरेको छ । धार्मिक कार्यक्रम सञ्चालन गर्दा त्यसको बहानामा अर्को धार्मिक संस्थामाथि आक्रमण गर्ने उच्छृङ्खल समुह र व्यक्तिहरुलाई कारबाही गर्न पनि धार्मिक संगठनहरुले सुरक्षा निकायसँग माग गरेका छन् ।

प्रमुख जिल्ला अधिकारी विश्व प्रकाश अर्यालको अध्यक्षतामा सम्पन्न बैठकमा प्रतिनिधिसभा सदस्य धु्रवबहादुर प्रधान, जिल्लाका चारवटै प्रदेशसभा सदस्य, सुरक्षा निकायका प्रमुखहरुको सहभागिता रहेको थियो । सो क्रममा प्रतिनिधि सभा सदस्य र प्रदेश सभा सदस्यहरुले धार्मिक र सामाजिक सहिष्णुता कायम गर्न सबैले सबै धर्मको सम्मान गर्नुपर्नेमा जोड दिएका थिए । केहि दिन अगाडी रामग्राम भित्र रहेको तिन ओटा चर्चमा धार्मिक सद्भाव खलबल गराउने खालका क्रियाकलाप भएको भन्दै ईसाइ समाजले दोषीमाथि कारवाहीको माग गर्दे आएको थियो ।