खोज

बुटवल, १७ भदौ ।

एमालेको प्रथम लुम्बिनी प्रदेश अधिवेशनमा नयाँ नेतृत्वका लागि अध्यक्ष पदमा राधाकृष्ण कंडेल र हरि रिजालले उम्मेदवारी दर्ता गराएका छन् । कंडेल वतृमान अध्यक्ष हुन् भने रिजाल केन्द्रीय सदस्य हुन् ।

मतदाता नामावली प्रकाशन गरेर पदाधिकारीको मापदण्ड खोज्न जुटेको निर्वाचन कमिटीले आइतबार साँझ संशोधित सूचना प्रकाशित गरेको छ । उम्मेदवारी दर्ता गर्ने मिति र समय बाहेक सबै कार्यक्रमहरु पछि प्रकाशित गर्ने गरी निकालिएको सूचना अनुसार उम्मेदवारहरुले भोलि बिहान १० बजे सम्म उम्मेदवारी दर्ता गर्न सक्ने छन् ।

साँझ ५ बजेबाट उम्मेदवारी दर्ता खुलेको थियो । जस अनुसार अहिलेसम्म अध्यक्ष पदमा २ जना र अन्य पदाधिकारी र सदस्यहरु गरी १०५ जनाको उम्मेदवारी दर्ता भएकोे छ । अध्यक्षमा उम्मेदवारी दर्ता गराएका रिजालको दर्ता नम्बर १०१ र कंडेलको दर्ता नम्बर १०५ रहेको निर्वाचन कमिटीले जनाएको छ । रिजालको उम्मेदवारीमा बिजयविराज बिष्ट प्रस्तावक र बालसिंह काउछा समर्थक रहेका छन् भने कंडेलको उम्मेदवारीमा राजुप्रसाद श्रेष्ठ प्रस्तावक र भोजराज पोखरेल समर्थक रहेका छन् ।

१ हजार ४ जना प्रतिनिधिहरुको नाम सार्वजनिक गरी दाबी विरोधको लागि आह्वान गरिएपनि थप प्रक्रिया अघि बढाउन नेतृत्व चयन गर्दा पदाधिकारीको संख्या तथा पद बारे टुङ्गो नलागेपछि आइतबार दिनभरी निर्वाचन कमिटी अलमल परेको थियो । २०५ जनाको कमिटी गठन गर्न भनिए पनि अध्यक्ष बाहेक अन्य पदाधिकारी के कति रहने भन्ने यकिन गर्नका लागि आयोजकले थप एक घण्टाको समय मागेको भएपनि त्यसको किनारा लगाउन आज दिनभरी लागेको बन्दसत्रका एक प्रतिनिधिले बताए ।

एमाले अध्यक्ष ओलीले सहमतिबाट नेतृत्व चयन गर्न निर्देशन गरेर काठमाडौं फर्किए पनि अन्नतः चुनाबी प्रक्रियामै गएर नेतृत्वको टुङ्गो लगाउने निश्चित जस्तै देखिएको छ ।

बुटवलको अन्तर्राष्ट्रिय सम्मेलन केन्द्रमा जारी अधिवेशनका लागि १२ वटै जिल्लाका ८२ हजार ८९५ पार्टी सदस्यहरुबाट छानिएका प्रतिनिधि तथा विभिन्न २३ वटा जनसंगठनहरुबाट छानिएका गरी १ हजार ४ प्रतिनिधिहरु सहभागी छन् ।