खोज

दाङ, १६ भदौ ।

सञ्चार तथा सूचना प्रविधिमन्त्री रेखा शर्माले हजारौं सहिदको बलिदानकै कारण नेपालमा राजनीतिक परिवर्तन संभव भएको बताएकी छन् । दाङको घोराही उपमहानगरपालिका –१७ बर्गदीस्थित सहिदस्मृति पार्कमा आयोजित कार्यक्रममा उनले यस्तो धारणा राखेकी हुन् । नेकपा माओवादी केन्द्रले सुरु गरेको तीन महिने बिशेष रुपान्तरण अभियान उदघाटनका अवसरमा मन्त्री शर्माले अब सहिद सपना पूरा गर्ने गरी पार्टी र सरकार अघि बढ्ने बताइन् ।

शान्ति प्रक्रियापछि पार्टी पटक पटक सरकारमा गए पनि जनताले चाहेजस्तो परिवर्तनको अनुभूति गर्न नपाएको उल्लेख गर्दै उनले अहिलेको सरकार गठन भएपछि जनताको पक्षमा काम हुन थालेकाले त्यसलाई जनताको बीचमा लैजान र जनताको गुनासो सरकारसमक्ष पुर्याउन यो अभियान सुरु गरिएको बताइन् । सबै नेता कार्यकर्तालाई जनताको घरघरमा पुग्न आग्रह गर्दै उनले राजनीतिलाई सेवाको रुपमा लिनुपर्ने बताइन् । राजनीतिलाई व्यक्तिगत लाभमा प्रयोग गर्ने प्रवृत्तिको अन्त्य गर्नुपर्ने उल्लेख गर्दै उनले अनियमितता र भ्रष्टाचार गर्नेहरु आफ्नै भएपनि नछाढ्ने सरकारको प्रतिबद्धता रहेको बताइन् ।

सहिदको बलिदानका कारण राजनीतिक व्यवस्था बदलिएको उल्लेख गर्दै अब सहिदका सपना पूरा गर्न जनताको अवस्था बदल्नुपर्ने उनले बताइन् । वर्तमान सरकार गठन भएदेखि निरन्तर जनताको सेवा, सुविधा र सुशासनलाई प्राथमिकता राखिएको मन्त्री शर्माले बताइन् । इतिहासमा पहिलो पटक सरकार जनतासित जोडिएको उल्लेख गर्दै उनले सुशासन, समृद्धि र सामाजिक न्यायको बाटोमा अघि बढिरहेको बताइन् ।

यो ठाउँमा २०५८ मङ्सिर १३ गते धान दाइरहेका किसानमाथि तत्कालीन सेनाले गोली चलाउदा ११ जनाको ज्यान गएको थियो । मन्त्री शर्माले सहिदको शालिकमा माल्यार्पण गरी तीन महिने अभियान उदघाटन गरेकी हुन् ।