खोज

बाँके, १६ भदौ ।

स्थापनाको एक वर्षपछि लुम्बिनी प्रदेश सरकारले स्थापना गरेको लुम्बिनी प्राविधिक विश्वविद्यालयले भर्ना खुलाएको छ । भदौ ६ गते दुईवटा कार्यक्रमका लागि भर्ना खोलिएको विश्वविद्यालयले जानकारी दिएको छ ।

विश्वविद्यालयले ‘बिटेक इन आईटी’ र ‘बिटेक इन सिएस एण्ड एआई’ कार्यक्रममा भर्ना खोलेको हो । आगामी असोज ६ गते फारम भर्ने अन्तिम समय कायम गरिएको छ भने दुईवटा कार्यक्रममा ४८÷४८ विद्यार्थीको कोटा तोकिएको छ ।

भर्ना खोलेपनि विश्वविद्यालयको पूर्वाधार निर्माणको काम हुन सकेको छैन । अहिले रहेको कार्यालयबाटै पढाउने योजना छ । विश्वविद्यालय खजुरामा प्रस्तावित गरिएको छ । विश्वविद्यालयका उपकुलपति प्राध्यापक विनोद ढकालका अनुसार चालु शैक्षिक सत्रबाट ‘बिटेक इन आईटी’,‘बिटेक सिएस एण्ड एआई’, ‘बिटेक इन आईटी इन्जिनियरिङ्ग’ लगायत पाँचवटा शैक्षिक कार्यक्रम संचालन गर्ने लक्ष्य छ । तर हाल दुईवटा कार्यक्रममा भर्ना खोलिएको छ ।

अर्को वर्षको शैक्षिक सत्रबाट थप कार्यक्रम संचालन हुने कार्यक्रम रहेको उपकुलपति ढकाल बताउँछन् । उनका अनुसार खजुराको केन्द्रीय क्याम्पसमा इन्जिनियरिङ्ग र सूचना प्रविधि र निकट भविष्यमा दाङ्ग र रुपन्देहीमा कृषि, वन र पर्यटनसंग सम्बन्धित कार्यक्रम संचालन हुने छन् । तर यी कार्यक्रम सञ्चालनका लागि पूर्वाधार खोज्न सकस परेको छ ।

लुम्बिनी प्राविधिक विश्वविद्यालय बाँकेको खजुरा गाउँपालिका–८ मा प्रस्ताव गरिएको छ । त्यहाँको एक सय बिगाह जग्गा विश्वविद्यालयको नाम गर्ने वा लिजमा दिने भन्ने रायसहित गाउँपालिकाले जिल्ला प्रशासन कार्यालय बाँके मार्फत सरकारसंग अनुमति मागेको थियो । मन्त्रालयले सकारात्मक सहयोग गरेको खजुरा गाउँपालिका अध्यक्ष डम्बर बिक तुफान बताउँछन् ।

तुफानले जग्गाका विषयमा कानून बमोजिम सरकारसंग माग गरिएको हुँदा त्यसको निकास निस्किएको बताए । विश्वविद्यालय स्थापनाकालमा महत्वपूर्ण भूमिका निर्वाह गरेका खजुरा गाउँपालिकाका निर्वतमान अध्यक्ष किस्मतकुमार कक्षपतिले बर्षदिन पुरा हुँदा पनि पूर्वाधार निर्माणको काममा प्रगति नहुँनु दुःखद कुरा भएको बताउँदै भन्छन्,–‘तत्काल पूर्वाधार निर्माण हुन नसक्ने अबस्था छ भने जनकशिक्षा सामग्री केन्द्र वा अन्य कुनै विकल्प खोजेर खजुरामै विश्वविद्यालयको कार्यालय राख्नुपर्छ र पढाई पनि त्यही शुरु गर्नुपर्छ ।’

कक्षपतिले जनक शिक्षा सामग्री केन्द्रको भवन सबैभन्दा उत्तम विकल्प भएको बताउँदै त्यसका लागि केन्द्रीय सरकारलाई जसरी पनि मनाउनुपर्ने बताए । ‘त्यो दिन मानिरहेका छैनन् भन्ने सुनेको छु तर विश्वविद्यालयलाई पूर्वाधार सम्पन्न बनाउन लाग्ने हो भने जसरी पनि जनकशिक्षाको भवनलाई उपयोग गर्नुपर्छ’– कक्षपतिले भने ।

लुम्बिनी प्रदेश बिश्वबिद्यालयको काम तत्कालीन मुख्यमन्त्री शंकर पोखरेलको पालामा अघि बढेको थियो भने कुलप्रसाद केसीको पालामा राजपत्रमा प्रकाशित भई कार्यान्वयनमा आएको थियो । खजुरामा एक सय बिघा जग्गा उपलब्ध गराउने प्रतिबद्धता अनुसार बाँकेमा विश्वविद्यालय स्थापना भएको कक्षपति बताउँछन् ।