खोज

काठमाडौँ, १५ भदौ

कोशी प्रदेशका मुख्यमन्त्री उद्धव थापाविरुद्ध परेको रिटका शुक्रबार पूर्ण सुनुवाइ नहुने भएको छ। न्यायाधीश ईश्वरप्रसाद खतिवडा र सुष्मालता माथेमाको इजलासमा पेशी परेको थियो।

तर न्यायाधीश खतिवडाले आफूले यो रिटमा पूर्ण सुनुवाइ नगर्ने बताएपछि शुक्रबार सुनुवाइनै नहुने भएको हो। ‘आज सुनुवाइ नहुने भयो, न्यायाधीश खतिवडाले म हेर्दिनँ भन्नु भयो’, वरिष्ठ अधिवक्ता टिकाराम भट्टराईले नेपालखबरसँग भने।
यसअघि खतिवडाको एकल इजलासले नै प्रारम्भिक सुनुवाइ गरेको थियो। खतिवडाले नै आज पूर्ण सुनुवाइका लागि पेशी तोकेका थिए। तर गोलाप्रथाबाट पेशी तोक्दा उनैको इजलासमा परेपछि सुनुवाइ नुहुने भएको हो।
प्रारम्भिक सुनुवाइ गरेकै न्यायाधीशकोमा पूर्ण सुनुवाइ गर्न नमिल्ने बाध्यात्मक व्यवस्था भने होइन। तर खतिवडाले यसअघि नै आफूले आदेश गरिसकेकाले पूर्ण सुनुवाइ नगर्ने भनेकाले आजै आदेश नहुने भएको हो।
कोशीका मुख्यमन्त्री उद्धव थापाले विश्वासको मत लिँदा सभाध्यक्षको समेत मतले बहुमत पु¥याएको भन्दै विपक्षी दलका सांसद हिकमत कार्कीले सर्वोच्चमा रिट दायर गरेका हुन्।

कोशीमा गठबन्धनको पक्षमा बहुमत पु¥याउन सभामुखले राजीनामा दिएका थिए। सभामुखले राजीनामा दिइसकेपछि उपसभामुखले सभा सञ्चालन गर्नुपर्ने थियो।
तर उपसभामुख बिरामीको बहानामा काठमाडौं आएकी थिइन्। त्यसपछि जेष्ठ सदस्यले सभा सञ्चालन गर्नु पर्ने थियो। तर जेष्ठ सदस्यजतिलाई बिदामा राखेर विपक्षीले सत्ता पक्षलाई नै सभाध्यक्षता गर्न बाध्य बनाएका थिए।
सत्ता पक्षका सांसदले आफैं सभाध्यक्षता गरेर विश्वासको मत पनि दिएका थिए। त्यसविरुद्ध पूर्व मुख्यमन्त्री कार्की सर्वोच्च पुगेका हुन्। उनले उद्धव थापालाई मुख्यमन्त्रीबाट हटाएर आफूलाई मुख्यमन्त्रीको सपथ गराउन माग गरेका छन्।
कोशी प्रदेशका मुख्यमन्त्री थापाले भदौ ४ गते प्रदेश सभाबाट विश्वासको मत लिएका थिए। उनलाई सभाको अध्यक्षता गरेका सांसद इस्माइल मन्सुरको सहित आवश्यक बहुमत ४७ मत पुगेको थियो।
यसविरुद्ध नेकपा ९एमाले० संसदीय दलका नेता कार्कीले भदौ ६ गते सर्वोच्चमा रिट दिएका थिए। उनले प्रदेश प्रमुख पर्शुराम खापुङ, मुख्यमन्त्री थापा, प्रदेश सभा सचिवालयलाई विपक्षी बनाएका थिए। तर उनले उपसभामुखलाई भने विपक्षी बनाएका छैनन्। उपसभामुख उनकै दलकी सिर्जना दनुवार छिन्।