खोज

कपिलवस्तु, १२ भदौ ।

नेपालले पहिलो पटक एशिया कप क्रिकेट खेल्न थालेको पुर्व सन्ध्यामा कपिलवस्तुको तौलिहवामा दिप प्रज्जवल गरिएको छ । कपिलवस्तु क्रिकेट संघको आयोजनामा जिल्ला प्रशासन कार्यालय अघिको मुल सडकमा दिप प्रज्जवल गरिएको हो ।

लुम्बिनी प्रदेशसभा सदस्य सुधाकर पाण्डेय, प्रजिअ शंकरहरी आचार्य, नगर प्रमुख सुदिप पौडेल, जिल्ला खेलकुद विकास समितिका अध्यक्ष राजेश उपाध्याय र क्रिकेट संघका जिल्ला अध्यक्ष प्रकाश गैरेले मैनवत्ती बालेर नेपाली टोलिको जितको कामना गरेका थिए ।

सो अवसरमा बोल्दै लुम्बिनी प्रदेशसभाका सदस्य सुधाकर पाण्डेयले नेपाली खेलाडीले एशिया कप खेल्नु नेपालका लागि ऐतिहासिक क्षण भएको बताए । खेल क्षेत्र र खेलाडी प्रति राज्यको लगानी कम रहेको बताउँदै अब खेल क्षेत्रमा लगानी बढाउन आवश्यक रहेको बताए ।

क्रिकेट खेलका लागि पूर्वाधारको कमि रहे पनि नेपाली खेलाडीले उत्कृष्ट प्रदर्शन गरेका कारण एशिया कपको अवसर जुरेको क्रिकेट संघका जिल्ला अध्यक्ष प्रकाश गैरेले बताए । सन् २०२७ मा महिला अन्डर नाईन्टिन क्रिकेट वल्र्डकप नेपालमा हुने र खेलको आयोजना नेपाल क्रिकेट संघले गर्ने अध्यक्ष गैरेले जानकारी दिए । राज्यले अब क्रिकेट खेललाई प्राथमिकता र बढावा दिने समय आएको संघका प्रदेश सदस्य पदमराज श्रेष्ठले बताए ।

नेपालले बुधवार एसिया कपको उदघाटन खेलमा घरेलु टोली पाकिस्तानसँग खेल्दै डेब्यू गर्नेछ । नेपाल र पाकिस्तान बीचको खेल पाकिस्तानको मुल्तान रंगशालामा दिउँसो ३ः४५ मा शुरु हुनेछ । नेपाली टोलीले एशिया कपका विभिन्न खेल पाकिस्तान र श्रीलंकामा खेल्ने छ ।