खोज

पाल्पा, ११ भदौ ।

गिट्टी, बालुवा निकासीको रोयल्टी रसिद प्रमाणिकरणको माग गर्दै तीन दिनदेखि बगनासकाली गाउँपालिकाको कार्यालयमा धर्ना बस्दै आएका वडा–६, यम्घा दर्पुकका बोटे युवाहरुले धर्ना स्थगित गरेका छन् । पालिकाले रोयल्टी रसिद प्रमाणीकरण गरेको प्रमाणित प्रतिलिपि दिएपछि उनीहरुले धर्ना स्थगीत गरेका हुन् ।

राजश्व समितिको बैठक बसी पालिका अध्यक्ष सरस्वती चिदी (दर्लामी), उपाध्यक्ष हरिप्रसाद पाठक र प्रमुख प्रशासकीय अधिकृत बद्रीनाथ लम्सालले युवाहरुको आग्रह अनुसार रोयल्टी रसिद रुजु गरी प्रमाणित प्रतिलिपि दिएका छन् । ३५ वर्षीय दलबहादुर बोटे, २७ वर्षीय प्रकाश बोटे र ६८ वर्षीय लेखनाथ अधिकारीले नदीजन्य पदार्थ निकासीबापत ठेकेदारले काटेको रोयल्टी बापतको रसिद सक्कल भए, नभएको प्रमाणित गरिदिन माग गर्दै शुक्रबारदेखि धर्ना बसेका थिए । गाउँपालिकाले रोयल्टी बापतको बिल प्रमाणिकरण गर्न आइतबारको समय दिएपछि उनीहरु धर्ना बसेका हुन् ।

वडाका वडाअध्यक्ष लक्ष्मी अधिकारीले डम्पिङ गरेको भन्दै कार्यपालिकाले एक महिना पहिला वडाअध्यक्ष अधिकारीलाई जरिवाना गर्ने निर्णय गरेको थियो । तर डम्पिङ गरिएको बालुवा वडाअध्यक्षको नभएको भन्दै वडाका ती बोटे युवाहरुले आफुहरुले रोयल्टी तिरेर ल्याएको बताउँदै आएका थिए । उनीहरुको बील नक्कली रहेको भन्ने विषय बाहिर आएपछि ती युवाहरु रसिद प्रमाणिकरणका लागि पालिका पुुगेका हुन् । युवाहरुले दिएको निवेदन र ठेकेदारले काटेको रोयल्टी बापतको रसिद रुजु गर्दा एउटै देखिन आएको स्रोतले जनाएको छ ।