खोज

सल्यान, ११ भदौ । सल्यानमा सवारी दुर्घटनामा ८६ जनाले ज्यान गुमाएका छन् । आर्थिक वर्ष २०७६/०७७ देखि चालु आर्थिक वर्ष २०८०/०८१ को हाल सम्म ८६ जनाको मृत्यु भएको तथ्यांक छ । दुर्घटना न्यूनीकरणका लागि जिम्मेवार निकायले प्रभावकारी चासो नदिँदा र सम्बन्धीत यात्रुले पनि जोखिम मोलेरै यात्रा गर्दा यति धेरै नागरिकको दुर्घटनामा परी अकालमै मृत्यु भएको हो ।

ट्राफिक कार्यालय सल्यानका अनुसार यस अवधिमा ६१ जना पुरुष, २२ जना महिला र ३ जना बालबालिकाले सवारी दुर्घटनामा ज्यान गुमाएका हुन् । तथ्यांक र विवरणहरू उपलब्ध गराउँदै कार्यालयका सहायक हवल्दार सन्तोष सिंहले चार वर्षयता ४२८ वटा सवारी दुर्घटनामा ७०६ जना घाइते भएको जनाए । उनका अनुसार आर्थिक वर्ष २०७६/०७७ मा ६८ वटा दुर्घटना भएका छन् ।

जसमा १० जना पुरुष र ५ जना महिला गरेर १५ जनाले ज्यान गुमाएका छन् भने ७ जना सख्त र ११२ सामान्य गरी ११९ जना घाइते भएका छन् । यस्तै आर्थिक वर्ष ०७७/०७८ मा १० जना पुरुष र एक जना महिलाको मृत्यु भएको छ । प्रहरीको रेकर्ड अनुसार यो आर्थिक वर्षमा १४३ वटा सवारी दुर्घटना भएका थिए । र ८ जना सख्त तथा १९८ जना सामान्य गरी २०६ जना घाइते भएका थिए ।
आर्थिक वर्ष ०७८/०७९ मा सल्यानमा १३३ वटा सवारी दुर्घटना भएको र दुर्घटनामा ३६ जनाको ज्यान गएको थियो । ज्यान जानेमा २३ जना पुरुष, ११ जना महिला र २ जना बालवालिका छन् । सख्त ६६ र सामान्य १८९ गरी यो आर्थिक वर्षमा २५५ जना घाइते भएको तथ्यांक छ । गत आर्थिक वर्ष ०७९।०८० मा ८४ वटा दुर्घटना हुँदा १६ जना पुरुष, ४ जना महिला र १ जना वालवालिकाको मृत्यु भएको देखिन्छ । जसमा ४३ जना सख्त र ६७ जना सामान्य गरी ११० जना घाइते भएका थिए । प्रहरीका अनुसार चालु आर्थिक वर्षको श्रावण र भाद्र महिनाको हाल सम्म ३ जनाको मृत्यु भएको छ भने १६ जना घाइते भएका छन् ।

राजस्व बढ्योः

ट्राफिक प्रहरीले सल्यानमा नियम विपरित चल्ने सवारी साधनलाई कारवाही गर्दा गत आर्थिक वर्ष २०७९।०८० मा ५२ लाख १४ हजार ५०० रूपैयाँ राजस्व संकलन गरेको छ । ट्राफिक नियम पालना नगर्ने ६ हजार ७६१ सवारीसाधनलाई कारवाही गर्दा उक्त रकम संकलन भएको हो । चालु आर्थिक वर्ष २०८०।०८१ को श्रावण महिनामा मात्रै २३४ सवारी कारवाहीमा परेका छन् । कारवाहीबाट एक महिनाको अवधिमा एक लाख ७७ हजार रूपैयाँ राजस्व दाखिला गरिएको सहायक हवल्दार सिंहको भनाई छ ।

कार्यालयका अनुसार आर्थिक वर्ष ०७८।०७९ मा ट्राफिक प्रहरीले सल्यानमा ६ हजार १६० वटा सवारी साधनलाई कारवाही गरेको थियो । जसबाट ५४ लाख ८३ हजार ५०० रूपैयाँ र त्यसको अघिल्लो आर्थिक वर्ष ०७७।०७८ मा ४ हजार ६१६ सवारीलाई कारवाही गरेर ४६ लाख ३४ हजार ५०० रूपैयाँ राजस्व संकलन गरिएको थियो ।

सवारी दुर्घटनाका कारण के हुन् ?

ग्रामिण क्षेत्रमा निर्माण भएका सडकमा तत्कालै गाडी चलाउन थाल्नु, ट्राफिक नियमको परिपालना नगरी लापरवाही गरेर सवारी चलाउने प्रवृत्ति, तीव्र गतिमा सवारी चलाउने आकांक्षा तथा मानसिक तनाव एवम् थकानको अवस्थामा पनि सवारी सञ्चालन गर्नुपर्ने बाध्यता लगाएतका चालकका कारण सवारी दुर्घटना हुने गरेको ट्राफिक प्रहरीले जनाएको छ ।

यस्तै यात्रु तथा सर्वसाधारणका कारण पनि सवारी दुर्घटना हुने गरेको देखिन्छ । सडकको प्रयोग एवं उपयोगिताको सम्बन्धमा पर्याप्त ज्ञान नहुनु, सडक तथा सडक किनारमा पशुपन्छी तथा चौपाया छाडा छाड्ने प्रवृत्ति, सडक अतिक्रमण गरी फुटपाथमा व्यापार गर्ने, सडक किनारामा निर्माण सामग्री तथा फोहोरमैला थुपार्ने प्रवृत्ति, सवारीसाधनमा जथाभावी चढ्ने र ओर्लने प्रवृत्ति, जसरी पनि छिटो र समयमै गन्तव्यमा पुग्ने अभिलाषा जस्ता कारणले पनि दुर्घटनाको जोखिम बढी देखिएको जानकारहरू बताउँछन् ।

यस अलावा सवारी साधनको अवस्था तथा यान्त्रिक कारण पनि सवारी दुर्घटना हुनेगरेको छ । सवारी साधनको नियमित मर्मत सम्भार तथा परीक्षण नगर्ने, निश्चित समयसीमापछि सवारी साधन विस्थपित नगर्ने, सामान्य बिग्रेको सवारीसाधनको मर्मत नगरी जबर्जस्ती चलाउने गर्नाले पनि दुर्घटना हुने गरेको छ ।

यसका साथै सडकको निर्माण तथा मर्मत सुधारका क्रममा विशेषतः ‘सडक निर्माण मापदण्ड’ को पूर्ण परिपालना नगर्दा, प्राविधिक रूपमा अध्ययन नगरी सडक निर्माणमा तीव्रता दिँदा, सडकको नियमित मर्मत सुधार समयमै हुन नसक्दा, सडकको अवस्था झल्काउने पर्याप्त ट्राफिक संकेत तथा चिह्नहरूको प्रयोग नगर्दा, स्थानीय तहहरूले डोजर निर्मित सडक निर्माणलाई प्राथमिकता दिँदा तथा भइरहेको सडकको गुणस्तर सुधारभन्दा नयाँ सडक निर्माणमा विशेष जोड दिने प्रवृत्तिका कारण पनि सवारी दुर्घटना बढ्दै गएको सरोकारवालाहरू बताउँछन् । ट्राफिकको एकल प्रयासले मात्र सवारी दुर्घटना न्यूनीकरण गर्न असम्भव भएकाले सबैको साथ र सहयोग आवश्यक देखिन्छ ।