खोज

नवलपुर, ११ भदौ ।

हरेक वर्षायाम शुुरु भएपछि नारायणी नदी किनारमा बस्ने बासिन्दाको अवस्था सदैव चिन्ताजनक रहेको देखिन्छ । वर्षा लाग्यो अनि सही समयमा पानी पर्याे भने किसानको मुहारमा खुसी देख्न पाईन्छ । तर उनीहरुलाइ नारायणी नदीको उचित तटबन्ध हुन नसक्दा आजभोली यहाँका तटीय बासिन्दा निदाउने भन्दा धेरै जाग्राम बस्न बाध्य भएका छन् ।

नारायणी तटबन्धका लागि सरकारले पूर्वी नवलपरासी र चितवन जिल्लामा अरबौ रकम लगानी गरेर तटबन्धनको काम धमाधम शुुरु गरेको पनि वर्षौ भैसक्यो तर पनि रकम समयमै निकाशा नहुँदा र ठेकेदारले नपाउँदा अहिले नारायणी तटबन्ध अलपत्र अवस्थामा परेको छ ।

नारायणी नदीका कारण गैंडाकोट, देवचुली, कावासोती, मध्यविन्दु नगरपालिका र बिनयी त्रिवेणी गाउँपालिकाका स्थानीय हरेक वर्षायाममा प्रभावित हुने गर्दछन् । गैंडाकोट नगरपालिकाको वडा नं. १ देखि ९ सम्म तटबन्ध सुुरु गरिए पनि रकम अभावले अगाडि बढ्न नसकेको गैडाकोट नगरपालिकाका नगरप्रमुख मलनभक्त अधिकारीले बताए ।

गैंडाकोटमा तटबन्धनसँगै सडक निर्माण समेत सुुरु गरिएको नारायणी नदी ब्यवस्थापन आयोजनाका लागि चार अर्ब ७२ करोड मध्ये नवलपरासी खण्डमा मात्र एक अर्ब नौ करोड निकासाको सुुनिश्चतता भएको तर हाल सम्म ६० करोड माथि खर्च भईसकेको छ भने सरकारले रु २० करोड मात्र ठेकेदारलाई निकासा दिएको र बाँकी ४० करोड बढी भुक्तानी दिन नसक्दा कामै प्रभावित भएको नारायणी नदी ब्यवस्थापन आयोजनाका प्रमुख निर्देशक गणेश मरासिनीले जानकारी दिए ।

नवलपरासी पूर्वमा तीन खण्डमा तटबन्धको काम भैरहेको छ भने अहिले गैंडाकोट नगरपालिकाका धेरै वडाहरु प्रभावित हुने भएकाले यो आयोजना ढिलासुुस्ती हुँदा आयोजना प्रति नै निराशा छाएको गैडाकोट नगरपालिका वडा नं. ५ का वडाध्यक्ष रत्नप्रसाद सापकोटा बताउँछन् ।

नारायणी तटीय क्षेत्रका लाखौ बासिन्दाको जीउ धनको रक्षाका लागि नारायणी तटबन्ध नवलपरासी पुर्व र चितवनका झण्डै चार लाख जनताको लागि प्रभावकारी बन्न सक्यो भने मात्रै यहाँको नदीको दीर्घकालिन जोखिम हटेर जान सक्ने छ ।