खोज

बुटवल, ९ भदौ ।

सधै पढाइलेखाईमा व्यस्त रहने विद्यार्थीहरु शुक्रवार भने राप्ती गाउँपालिकाका विभिन्न विद्यालयहरुमा फरक दृश्यमा देखिए । यस्तै फरक दृश्य देखियो राप्ती गाउँपालिका वडा नम्बर ४ मौरीघाटमा रहेको माध्यमिक विद्यालयमा । झट्ट हेर्दा जो कोहीलाई लाग्थ्यो त्यहाँ केही व्यवसाय सञ्चालन भइरहेको छ । कतिपय विद्यार्थीहरुले कपाल काट्ने काम गरी रहेका थिए भने कतिपय विद्यार्थीहरुले विभिन्न प्रकारका चिया, कफी पकाइरहेका थिए । अल्लि पर गइसकेपछि केही विद्यार्थीहरु ब्युटिसियनको काम सिकिरहेका थिए भने केहीले कम्पोष्ट मल बनाउने तरिका र केहीले नृत्य सिकिरहेका थिए ।

त्यस्तै राप्ती गाउँपालिका वडा नम्बर २ लालमटियामा रहेको आदर्श नमुना माविका विद्यार्थीहरु पनि शुक्रवार फरक दृश्यमा देखिए । कक्षा १–५ सम्मका विद्यार्थीहरुले माटोबाट निर्मित सामग्रीहरु बनाइरहेका थिए । कक्षा ६–८ सम्मका विद्यार्थीहरु दुना टपरी बनाइरहेका थिए । त्यस्तै कक्षा ९–१० सम्मका विद्यार्थीहरु नर्सरी व्यवस्थापन र बेर्ना उत्पादन गरिरहेका थिए भने कक्षा ११–१२ सम्मका विद्यार्थीहरु सीपमुलक शिक्षा आजको आवश्यकता बिषयमा निबन्ध लेखिरहेका थिए । यी सबै क्रियाकलापहरु कुनै काल्पनिक नभई वास्तविक रहेका थिए । राप्ती गाउँपालिकाले पालिका भित्र रहेका सम्पूर्ण विद्यालयमा शुक्रबार किताबबिनै व्यवहारिक शिक्षा प्रदान गर्ने नीति लागू गरेसँगै विद्यालयहरुले विद्यार्थीहरुलाई त्यस प्रकारको व्यावहारिक शिक्षा प्रदान गर्न थालेका हुन् ।

राप्ती गाउँपालिकाका अध्यक्ष प्रकाश विष्टले विद्यार्थीहरुलाई किताबी ज्ञान सँगसँगै व्यावहारिक, जीवन उपयोगी र संस्कार युक्त शिक्षा प्रदान गर्ने गरेको बताए । विद्यालय अनुगमनमा गएका अध्यक्ष विष्टले सो कुरा बताएका हुन् । “पछिल्लो समयमा विद्यार्थीहरु उच्च शिक्षा हासिल गरेको प्रमाणपत्र हातमा भएर पनि बेरोजगार हुनु परेको छ”– अध्यक्ष विष्टले भने –“यसको मुख्य कारण नै व्यावहारिक र जीवन उपयोगी शिक्षाको कमी हो ।” कम्तीमा हप्ताको एक दिन भए पनि विद्यार्थीहरुलाई व्यावहारिक र जीवन उपयोगी शिक्षा प्रदान गर्ने उद्देश्यले पालिकाले बुक फ्रि डे को नीति लागू गरेको अध्यक्ष विष्टको भनाई रहेको छ ।

माध्यमिक विद्यालय मौरीघाटकी प्रधानाध्यापक सीता रिजालले विद्यालयले प्रत्येक शुक्रबार यसैगरी विद्यार्थीहरुलाई विभिन्न सिर्जनात्मक क्रियाकलापमा सहभागी गराउँदै आइरहेको बताइन् । पालिकाले शुक्रबार किताबबिनै व्यावहारिक शिक्षा प्रदान गर्ने नीति लागू गरेसँगै पालिकाका अन्य विद्यालयहरुमा समेत यस्ता क्रियाकलापहरु सञ्चालन गर्ने गरेका छन् । यस्तै आदर्श नमुना मावि लालमटियाका प्रधानाध्यापक किरण पोख्रेलले हरेक हप्ताको शुक्रवार बुक फ्रि–डे कार्यक्रम अन्तर्गत विद्यार्थीहरुलाई उनीहरुको कितावी ज्ञानसँगै सिपमुलक, संस्कारयुक्त र जीवनउपयोगी कार्यक्रम सञ्चालन गर्दै आएको बताएका छन् । यस प्रकारको कार्यक्रमले विद्यार्थीहरु समेत उत्साहित भएको प्रधानाध्यापक पोख्रेलले बताए ।