खोज

बुटवल, ९ भदौ ।

बुटवलको मुख्य सडकमा यातायात आवागमनमा असहजता हुने गरेको छ । छाडा चौपायाले छ लेनको सडक नै कब्जा गर्ने गरेपछि सयौँ सवारीसाधनले सस्ती खेप्नुपरेको छ ।

बुटवल–भैरहवा जोड्ने छ लेन सडकमा गाईबस्तुको राज हुने गरेको छ । २० किलोमिटर लामो सो सडकको बुटवल खण्डमा गाईबस्तु सडकमै आउँदा सवारी चालकहरूलाई सवारी साधन चलाउन कठिनाइ हुने गरेको छ ।

स्थानीयवासीले दुध दिन छोडेपछि घर निकाला गरेका गाईबस्तु सडकमा भेटिने गरेका हुन् । सडकमा छाडिने गरिएका चौपायालाई नियामक निकायले नियन्त्रणमा नराख्ने र सडकमा छाड्नेहरूलाई पहिचान गरी कारबाही गर्न जोडदार माग हुँदै आएपनि त्यसतर्फ सरोकारवाला निकायको ध्यान जान सकेको छैन ।

कानुनले छाडा पशु र चौपाया व्यवस्थित गर्ने अधिकार स्थानीय सरकारलाई दिएको छ। नेपालको संविधानको स्थानीय सरकार सञ्चालन ऐनको परिच्छेद–३ अन्तर्गत दफा–११ को उपदफा २ मा छाडा पशु चौपायाको नियन्त्रण गर्ने अधिकार सुनिश्चित गरेको छ।

पछिल्लो ६ वर्षको अभ्यासले स्थानीय सरकारले समस्या समाधान गर्न असफल देखिएका छन्। स्थानीय तहहरूले प्रदेशस्तरको गौशाला आवश्यक भएको बताए पनि त्यसको अगुवाइ गर्ने संयन्त्र भेटिएको छैन।

पालिका–पालिकाबीच समस्या देखिए पनि सामूहिक प्रयत्न नहुँदा समस्या जटिल बन्दै गएको छ। बुटवल उपमहानगरका प्रमुख प्रशासकीय अधिकृत टेकराज पन्थीले मानवीय लापरबाहीका कारण समस्या जटिल बनेको बताए।

दूध दिँदासम्म गोठमा बाँध्ने र दूध दिन छाडेपछि गाईलाई सडकमा ल्याएर छाड्ने प्रवृत्ति रहेको उनको भनाइ छ। ‘बुटवल उपमहानगरले कार्यविधि बनाएर नियन्त्रणको प्रयास गरेको छ। मुख्य कुरा सरोकारावालाहरूबीच सहकार्य र एकता आवश्यक छ,’ उनले भने।