खोज

नवलपुर, ८ भदौ ।

पछिल्लो एक महिनामा नवलपरासी पुर्वमा डेंगुका बिरामीको संख्या एक सय ४६ पुगेको छ ।

स्वास्थ्य कार्यालय नवलपरासी पुर्वले दिएको जानकारी अनुुसार डेंगु तथा आँखाको भाईरल कन्जक्टिभाईटिस रोग जिल्लामा साउन महिनामा मात्र प्रभावित हुनेको संख्या बढेको हो भने डेंगुबाट संक्रमित हुनेको संख्या ७८ जना महिला र ६८ जना पुरुष गरेर एक सय ४६ पुगेको जनाइएको छ ।

यसैगरी आँखा पाक्ने रोगबाट जिल्लामा यकिन तथ्याँक नभए पनि सानै उमेरदेखि बुढापाका सम्मका २० प्रतिशत जिल्लाबासी प्रभावित भएका जिल्ला स्वास्थ्य कार्यालयका प्रमुख केशव प्रसाद चापागाँईले बताए । नवलपरासी पुर्वको जनसंख्या तीन लाख ४० हजारको हाराहारीमा रहेको छ ।

जिल्लामा सबैभन्दा धेरै डेंगुका बिरामी मध्यविन्दु नगरपालिकामा फेला परेका छ्न् । मध्यविन्दुमा ३५ जना महिला र १८ जना पुरुष गरेर ५३ जना डेंगुका बिरामी रहेका छन् भने कावासोतीमा २३ महिला र १४ पुरुष सहित ३७ जना, देवचुलीमा १३ महिला र १० पुरुष सहित २३ जना, गैंडाकोटमा १० महिला र १२ पुरुष सहित २२ जना र विनयी त्रिवेणीमा सात महिला र चार पुरुष गरेर ११ जना डेंगुका बिरामी फेला परेका हुन् ।

स्वास्थ्य कार्यालयले दिएको जानकारी अनुसार आर्थिक वर्ष ७९÷८० मा जिल्लामा एक सय ५९ महिला र दुुई सय १५ पुरुष गरेर कुल तीन सय ७४ जना डेंगुका बिरामी फेला परेका थिए ।

डेँगुु रोगबाट आल सम्म कसैको पनि ज्यान नगए पनि अहिले पनि अस्पतालमा यो रोगका बिरामीहरु आउने गरेका मध्यबिन्दु जिल्ला अस्पतालले जनाएको छ ।