खोज

सडकले नै सम्मृद्धि लिएर आएको हुन्छ । सडक विकासको न्यूनतम पूर्वाधार हो । जहाँ सडक पुगेको छैन, त्यहाँ विकास पनि पुग्दैन । तसर्थ सडकले जोड्छ विकासलाई । सडकले गाउँमा सम्मृद्धि ल्याउँछ । सडकसंगै सम्मृद्धिको सपना गाउँको अभिलाषा हो । नेपालमा सडक सम्मृद्धिको सपना पूरा गर्न धेरै पहिलेदेखि प्रयास भएको हो तर बिडम्वना अहिलेसम्म नेपालका दूरदराज गाउँसम्म विकास पुगेको छैन । गाउँलाई सडकले जोड्न सकिरहेको छैन । सडक पुगेको छ तर कालोपत्रे नहँुदा मोटर जान सकिरहेको छैन । त्यस्तै एक सडक हो जसले बर्षौदेखि शहर र गाउँलाई जोड्ने उद्देश्यले निर्माण सुरु गरिएको थियो, त्यो अहिलेसम्म पूरा हुन सकेको छैन ।

रूपन्देहीको सालझण्डीदेखि अर्घाखाँचीको सन्धिखर्क हँुदै वाग्लुङको ढोरपाटन जोडने मोटर बाटो त्यस क्षेत्रका लाखौं मानिसका लागि सम्मृद्धिको सपना थियो । मोटरबाटो बनेपछि भगवान गौतमबुद्धको जन्मस्थान लुम्बिनी र बाग्लुङको ऐतिहासिक शिकार आरक्ष रहेको ढोरपाटन जोड्न महत्वपूर्ण सहयोग पुग्ने आशा गरिएको थियो । तर, यो सडक निर्माण सुरु भएको करिव १४ बर्ष हुँदासम्म पनि पूरा हुन सकेको छैन । दुःखको कुरा के हो भने यो सडक निर्माण सम्पन्न हुन अझै कति समय लाग्ने हो कुनै निश्चित छैन । यो सडकले जनतालाई सुविस्ता दिने ठानिएको थियो तर अहिले सडककै कारण जनताले सास्ती पाएका छन । अहिले हिलो र धुलोबाट सास्ती खेपेका जनताले मोटर बाटोको लागि दिएको जमिन सम्झिदै दुःख मान्ने गरेका छन् ।

तराई र हिमाललाई समेत जोड्ने यो सडक निर्माण सम्पन्न हुने हो भने गुल्मी, बाग्लुङ, प्यूठान र अर्घाखाँची हुँदै पाल्पाका जनतालाई ठूलो सुविधा पुग्ने थियो । बि.सं. २०६६ सालदेखि निर्माण सुरु गरिएको सडक पर्याप्त बजेटको समस्याका कारण पूरा हुन सकेको छैन । १ सय ८५ किलोमिटर लामो यो सडकलाई संघीय सरकारले राष्ट्रिय प्राथमिकताको आयोजनाका रूपमा अगाडी बढाएको थियो तर अहिले यसलाई लंगडो बनाउने काम भएको छ । यो सडकले रूपन्देहीमा ५, पाल्पामा २०, अर्घाखाँची ७०, गुल्मीमा ४० र वाग्लुङ जिल्लामा ५० किलोमिटर क्षेत्रफल ओगटेको छ । १४ बर्षको बीचमा बल्ल सडकको ट्रयाक खोल्ने काम पूरा भएको छ । अब स्तरोन्नतीको काममा कालोपत्रे संगै अन्य धेरै काम बाँकी रहेको बताइएको छ ।

बुटबलदेखि पाल्पा हुँदै गुल्मी र बाग्लुङका स्थानीय लाखौं जनताका लागि वैकल्पिक सडकका रूपमा यो सडकलाई हेरिएको छ । तर, १४ बर्ष हुँदापनि सडकको प्रगति आधा पनि नहुनुले जनता निरास भएका छन् । सुरूमा सडक निर्माण हुने भयो भन्ने सुन्दा खुसी भएका स्थानीय जनता अहिले निरास हुनुपर्ने अवस्था छ । बहुबर्षीयका नाममा यो सडकलाई अव कतिञ्जले लम्ब्याउने ? संघीय सरकारको यो आयोजनामा ध्यान नपुगेको होला । तसर्थ अव प्रदेश सरकारले सडक निर्माणका लागि र पर्याप्त बजेट ब्यवस्थाका लागि संघीय सरकारको ढोका ढकढक्याउने काम गरोस् । सडकका लागि बर्षेनी बिनियोजन हुने थोरै बजेटले अझै केही बर्ष यो सडक निर्माण हुने छनक देखिदैन । कालोपत्रे हुने आशामा बसेका त्यस क्षेत्रका यात्रु अहिले ग्राभेल सडककै कारण बढ्दो दुर्घटनाको नियती भोग्न बाध्य छन् । अतः सडक निर्माणमा सरकारको ध्यानाकर्षण होस् ।