खोज

दाङ, ६ भदौ ।

घोराही उपमहानगरपलिका –५ धर्ना धारापानीमा गत साउन २ गतेदेखि ३१ गतेसम्म सञ्चालित पुरुषोत्तम महात्म्य एवं श्रृङ्गारिक आरती बोलबम मासिक महामहोत्सवको आय व्यय विवरण सार्वजनिक गरिएको छ ।

महामहोत्सवमा अन्तर्राष्ट्रिय स्वर्णपदक बिभूषित पण्डित अमृतशरण देवाचार्यले पुरुषोत्तम महात्म्य प्रवचन दिएका थिए । बनारसी कलाकारहरुको टिमले संगीतमय लिलामय प्रवचन तथा भजन सञ्चालन गरेको थियो । पैसा कमाउने भन्दा पनि धारापानी मन्दिरलाई विश्वभर परिचित गराउन सकियोस् भनेर उहाँले स्वयंसेवी रुपमा प्रवचन दिएको मन्दिर व्यवस्थापन समितिका अध्यक्ष गणेशकुमार अधिकारीले जानकारी दिए । सो महामहोत्सवमा ३१ लाख ८२ हजार नौ सय ९१ रुपैयाँ आम्दानी भएको छ । सोही कार्यक्रममा २१ लाख २६ हजार ८६ रुपैयाँ खर्च भएको आर्थिक उपसमितिका संयोजक विमल अधिकारीले जानकारी दिएका छन् । १० लाख ५६ हजार नौ सय पाँच रुपैया बचत भएको जनाइएको छ । मन्दिरको प्रचार प्रसार, धर्म र धार्मिक आस्था थप सुढृड बनाउने उद्देश्यले आयोजित महामहोत्सवमा सवै भन्दा धेरै अन्य सहयोगबाट १९ लाख ७२ हजार तीन सय आठ रुपैयाँ संकलन भएको छ ।

गंगा आरतीका लागि सात लाख ८४ हजार चार सय ९० रुपैयाँ, ब्राह्मण भोजनका लागि एक लाख ८० हजार,भक्तजन प्रसादका लागि एक लाख ५० हजार र झोली दानबाट ९६ हजार एक सय ९३ रुपैयाँ संकलन भएको अधिकारीले जानकारी दिए । महामहोत्सवमा आरती गुरुहरुको दक्षिणा तथा वाद्यवादन कलाकार पारिश्रमिकमा ११ लाख ३३ हजार ६ सय ११ रुपैयाँ, टेन्ट तथा साउण्ड सिस्टममा तीन लाख, ब्राह्मण तथा अन्य भोजनका लागि एक लाख १७ हजार सात सय १५ रुपैयाँ, आरतीका लागि पुजा सामग्री खरिदका लागि एक लाख ३४ हजार ९० रुपैयाँ, जेनेरेटर पेट्रोलका लागि ९३ हजार पाँच सय ७७ रुपैयाँ खर्च भएको छ । खानेपानी तथा मेक्सन व्याट्री खरिदका लागि ३२ हजार दुई सय ३० रुपैयाँ, भान्साका लागि भाडा वर्तन खरिदका लागि ९३ हजार दुई सय ८३ रुपैयाँ, सुरक्षाकर्मी, स्वयंसेवक खाजा नास्ता तथा सामान ढुवानीका लागि २६ हजार दुई सय ६५ रुपैयाँ, नेटको राउटर, स्टेशनरी तथा बाद्यवादनका सामग्री खरिदका लागि ४१ हजार तीन सय ७० रुपैयाँ, कलाकार श्रृंगार सामग्रीका लागि ४७ हजार दुई सय ८५ रुपैयाँ खर्च भएको संयोजक अधिकारीले जानकारी दिएका छन् ।

मन्दिर सरसफाई तथा धर्मशाला व्यवस्थापनका लागि १९ हजार रुपैयाँ, बत्ती राख्ने टपरी खरिदका लागि ६ हजार एक सय १० रुपैयाँ, प्रचार सामग्री पम्प्लेट छपाईका लागि १५ हजार रुपैयाँ, पुजारी दक्षिणाका लागि १४ हजार पाँच सय, प्रशंसापत्र छपाई तथा फ्रेममा ३७ हजार पाँच सय ५० रुपैयाँ र मिडिया प्रचार प्रसारका लागि १४ हजार पाँच सय रुपैया खर्च भएको छ ।

भक्तजनहरुको ठूलो सहभागिता रहेको थियो । महामहोत्सव सफल बनाउन सहयोग गर्ने सवैमा पाण्डवेश्वर महादेव मन्दिर व्यवस्थापन समितिले धन्यवाद ज्ञापन गरेको छ । समितिका अध्यक्ष गणेशकुमार अधिकारी र सचिव विष्णुराम आचार्यले जिल्लामा पहिलो पटक आयोजना गरिएको महोत्सवमा सहभागी हुने सम्पूर्ण भत्तजनहरुमा धन्यवाद दिएका छन् । महोत्सव सफल बनाउन सहयोग गर्ने सुरक्षाकर्मी, राजनीतिक दल, सांसदहरु, विभिन्न धार्मिक, सामाजिक संघसंस्था, नागरिक समाज, जनप्रतिनिधि, सञ्चारकर्मी तथा बिभिन्न उपसमितिका सदस्यहरु, मन्दिरका कर्मचारी तथा पुजारी लगायत सवैमा आभार प्रकट गरेका छन् ।