खोज

नवलपुर, ६ भदौ ।

पूर्वी नवलपरासीको पहाडी हुप्सेकोट गाउँपालिका वडा नं. ४ रुम्सीमा विद्युुत पोल गाडेको १४ वर्षपछि बिजुली बालिएको छ ।

विद्युतीकरण गर्न १४ वर्षअघि त्यहाँ चारसय ४३ थान पोल गाडिएको र पोल संगसँगै तार पनि टाँगिएको भएता पनि बिजुुली बल्ने आशामा बसेका स्थानीयले १४ वर्षपछि बिजुली बाल्न पाउँदा आफुलाइ खुशी लागेको स्थानीय शमसेर आले मगरले बताए ।

१४ वर्षपछि जिल्लाको विकट क्षेत्रका एक सय ६५ घुरधुरीमा अहिले केन्द्रीय प्रसारणबाट विद्युतीकरण भएपछि गाउँमा मात्र नभएर त्यहाँका स्थानीयहरुको मुहारमा समेत उज्यालो आएको वडाध्यक्ष महेन्द्र पाण्डेले बताए ।

सदियौं कालदेखि टुकी र सोलार बालेर दैनिकी चलाउँदै आएका यहाँका स्थानीय जनता प्रत्येक घरमा पोल र तार टाँगेको १४ वर्षपछि भए पनि अहिले बिजुली बलेपछि हर्षित छन् । गाउँमा बत्ती नभएर कुुनै पनि काममा सहजता नआएको र अहिले भने बिजुुली पुुगेपछि धेरै सहजता आएको वडाध्यक्ष पाण्डेको भनाई छ ।

बिजुुली पुुगेपछि अब भने एक किसिमको समस्या हटेको छ । अहिले घरघरमा बिजुली बल्दा दैनिक कामकाज गर्न निकै सहज र गाउँ नै उज्यालो भएको स्थानीय मनमाया कानुङले बताइन् ।

केन्द्रीय विद्युतीकरण विस्तार र सञ्चालनसँगै चारघरेमा ७०, रुम्सीमा ६० र रिताहाका ३५ घरधुरी प्रत्यक्ष लाभान्वित भएका छन् । घरमा केन्द्रीय विद्युत् बलेपछि उज्यालो हुनुका साथै मोबाइल चार्ज गर्न, रेडियो सुन्न, विद्यार्थीलाई पढ्न लेख्नका साथै त्यहाँ रहेको हुप्सेकोट माविमा कम्प्यूटर कक्षा सञ्चालनदेखि आवश्यक विद्यालयको कामकाजमा समेत राहत पुगेको हुप्सेकोट माध्यमिक विद्यालयका प्रधानाध्यापक बम वहादुर सारु मगरले बताए ।

“ढिलै भए पनि आफ्नो घर गाउँमा बिजुली आउँदा आफुले घरमा धेरै सम्पत्ति नै भित्र्याएको जस्तो भएको छ”– हुप्सेकोट गाउँपालिका ४ का स्थानीय जिव वहादुर सिंजालीले खुशी ब्यक्त गरे ।

गाउँमा बिजुली पुगेपछि घरधन्दा गर्नेदेखि विद्यार्थीलाई अनलाइन कक्षा, लेखपढ गर्न, रेडियो टेलिभिजन हेर्न र सुन्न तथा कम्प्युटर चलाउन सजिलो भएको छ । “वर्षौदेखि अन्धकार झेल्दै आइरहेका पहाडी भेगका जनताले उज्यालो पाएका छन्”–हुप्सेकोट गाउँपालिकाका उपाध्यक्ष पूर्णसिंह रानामगरले भने ।