खोज

चन्द्रौटा (कपिलवस्तु) ३ भदौ ।  “खेतबारीमा पक्की नाला आएपछि मौसम सुख्खा भएपनि खेतीपाती गर्न पाएँ । समयमा पानी नपर्दा समस्या हुँदै आएको थियो । पक्की नाली निर्माण भएर सिँचाईको व्यवस्थापन हुँदा यस वर्ष समयमा व्याड राखेर अन्नबाली लगाउन पाइयो” कृषक गोविन्द प्रसाद बन्जाडेले भने ।

जिल्लाको बाणगंगा नगरपालिका वडा नम्बर–९, भर्तापुर घर भएका बन्जाडेले यस वर्ष समयमा व्याड राख्न पाएको बताउँछन् । यतिबेला उनको खेतमा धान हुर्कीएर हरिया भएका छन् । खेतको कुना कुनामा सिँचाई गर्न नालाको व्यवस्था भएपछि भर्तापुर, जिनुवाका कृषकहरू लाभान्वित भएका छन् । पहिला बोरिङबाट पानी ल्याउन नाला थिएन । अहिले खोलाको पानी खेतसम्म आएको छ । खेतसम्म पानी लैजाने नाला बनेपछि तरकारी, अन्नबालीलाई फाईदा भएको कृषक बन्जाडेले बताए । निर्माण भएका नालामा खोला र साना ठूला ट्युववेल र बोरिङको पानी र शाखा कुलाको पानीसमेत लैजान मिल्ने भएकाले सुक्खायाममा पनि सिंचाई हुने अर्की कृषक सीता भुसाल बताउँछिन् ।

वडा अध्यक्ष कमल पौडेलले सामुदायिक वन र स्थानीय सरकारले पानी बग्ने नाला निर्माण भएपछि कृषकहरूलाई सिँचाईमा सहज भएको बताए । अमृते सामुदायिक वन, कोइलीचौर साना किसान सामुदायिक वन र स्थानीय सरकारको संयुक्त लगानीमा विभिन्न खण्डमा गरी करिब ३ किलोमिटर नाला निर्माण भएको छ ।

वडा अध्यक्ष पौडेलका अनुसार नाला निर्माणपछि कोइली खोलामा रहेको बाँधको पानीलाई समेत खेतसम्म पुग्ने भएको छ ।
खोलामा पानी कम हुँदा बोरीङको पानी मिसाउने गरी नाला निर्माण भएको हो । अमृते सामुदायिक वनका अध्यक्ष योगेन्द्र पौडेलले सामुदायिक वनले गत आर्थिक वर्षमा २१ लाख ८५ हजार रकम नाला निर्माणमा खर्च गरेको जनाए । सो रकमले ९ सय ६ मिटर सहायक नाला निर्माण गरिएको बताउँदै कृषको समस्यालाई मध्यनजर गर्दै सिँचाई हुने गरी नाला निर्माण गरिएको छ ।

यस्तै कोइलीचौर सामुदायिक वनका अध्यक्ष कुन्तामणी भुसालले सिँचाई गर्न १ हजार ७० मिटर नाला निर्माण गरेको बताए । गत आर्थिक वर्षमा सामुदायिक वन र पालिकाको ३० लाखको लागतमा नाला निर्माण गरिएको उनले बताए । पक्की नाला नहँुदा समस्या हुँदै आएको थियो । त्यहि समस्या समाधान गर्न सामुदायिक वन र स्थानीय सरकारको लगानीमा सिँचाई प्रयोजनमा लगानी गरेको स्थानीय बताउँछन् । सडक किनारदेखि कृषकको खेतबारीसम्म नाला पु्याइएको वनले जनाएको छ ।