खोज

सुनवल, ३ भदौ ।

पश्चिम नवलपरासीको बर्दघाट ९ मा रहेको राजा महात्मा पूर्णभद्र माविमा अभिभावकहरुले तालाबन्दी गरेका छन् । विद्यालय व्यवस्थापन समितिका अध्यक्ष र प्रधानाध्यापकको राजीनामा माग गर्दै विद्यालयको प्रशासन शाखामा तालाबन्दी गरेको अभिभावकहरुको भनाई छ ।

विद्यालयमा लामो समयदेखि शैक्षिक, प्रशासनिक र आर्थिक सुशासनको विषयमा प्रश्न खडा हँुदै आएपनि विद्यालय व्यवस्थापन समिति गैरजिम्मेवार रुपमा प्रस्तुत भएको र विद्यालयको शैक्षिक अवस्था ध्वस्त हँुदै गएकाले तालाबन्दी गर्नुपरेको अभिभावक बाबु सुनारले बताए । “विद्यालयको शैक्षिक स्थिति खस्कँदै गएको छ, विद्यार्थी सङ्ख्या पनि ह्वात्तै घट्यो”–सुनारले भने । विद्यालयमा शिक्षकको अभावमा पठनपाठन प्रभावित भएपनि प्रधानाध्यापक गम्भीर नहँुदा बालबालिकाको भविष्य नै संकटमा परेको उनले बताए । ‘बोर्डिङ्ग स्कुलबाट विद्यार्थी ल्याएर विद्यालय राम्रो छ भन्दै सामुदायिकमा भर्ना गरियो, अहिले शैक्षिक अवस्था ध्वस्त छ”, ताला लगाउन पुगेका सुनारले सुनाए ।

तालाबन्दीपछि अभिभावकद्वारा जारी विज्ञप्तीमा विद्यालयमा विद्यार्थी सङख्या १४ सयबाट घटेर सात सय भएको, कक्षा ११ र १२ मा विद्यार्थी सङ्ख्या अत्यन्तै न्युन हुँदा बन्द हुने अवस्थामा पुगेको, विद्यालयको नतीजा लाजमर्दो भएको, विद्यालय लाखौँ ऋणमा डुबेको लगायतका कारण देखाउँदै अनिश्चितकालीन तालाबन्दी गरिएको उल्लेख छ । वडाअध्यक्ष नै विद्यालय व्यवस्थापन समितिको अध्यक्ष पदमा बसेर विद्यालयको यो अवस्था बनाएको भन्दै तत्कालै वर्तमान समिति विघटन गरी नयाँ व्यवस्थापन समिति पुनर्गठन गर्न अभिभावकहरुको माग छ ।

अभिभावकको भेलाबाट शिक्षक अभिभावक संघ गठनका लागि उम्मेदवारी दर्ता गराईएको भएता पनि हाल सम्म उक्त समिति गठन नभएको भन्दै सत्यतथ्य सार्वजनिक गर्न माग गरिएको छ । यसैगरी विद्यालयमा भएको आर्थिक अनियमितताबारे पनि तत्काल छानविन गरी सत्यतथ्य सार्वजनिक गर्न अभिभावकहरुले माग गरेका छन् । उक्त विद्यालयमा लामो समयदेखि आर्थिक अनियमितता भएको भन्दै अख्तियार दुरुपयोग अनुसन्धान आयोगमा समेत उजुरी परेको छ ।

विद्यालयको तत्कालीन अवस्थामा निर्माण समितिका संयोजक रहेका कृष्ण गिरीले विद्यालयमा लाखाँैको अनियमितता भएको भएपनि यथेष्ठ छानविन हुन नसकेको बताए । आफ्नो हस्ताक्षर समेत दुरुपयोग गरेर एक करोड बढी रकम दुरुपयोग भएको उनको दाबी छ । विद्यालयका प्रधानाध्यापकले आफुलाई अख्तियारमा बयान दिने क्रममा विद्यालयको बचाउ गरेर दबाब समेत दिएको र हिसाब किताबको विवरण हेर्न नदिएको गिरीको भनाई छ ।

सो विद्यालय व्यवस्थापन समितिको अध्यक्ष बर्दघाट ९ का वडा अध्यक्ष चन्द्रकान्त चापागाई छन् । अभिभावहरुले प्रधानाध्यापक र व्यवस्थापन समिति अध्यक्षको मिलेमतोमा आर्थिक अनियमितता गरी विद्यालयको शैक्षिक गुणस्तर ध्वस्त बनाएको आरोप लगाएका छन् ।

यसैबीच आइतबार विद्यालयमा तालाबन्दी भइरहँदा विद्यालयका प्रधानाध्यापक पुष्पराज अधिकारी भने परासीमा नेकपा माओवादी केन्द्रको कार्यक्रममा सहभागी थिए । माओवादी केन्द्रको जनतासँंग माओवादी विशेष रुपान्तरण अभियान अन्तर्गत नवलपरासी पश्चिमको जिल्ला समन्वय समितिको बैठकमा विद्यालय नै छाडेर प्रधानाध्यापक अधिकारीले सहभागिता जनाएका हुन् । यस विषयमा जिज्ञासा राख्दा उनले आफु शिक्षक संगठनको अध्यक्ष भएकाले शिक्षकहरुका समस्याका विषयमा जानकारी गराउन मात्र उपस्थित भएको तर्क गरे ।

कार्यक्रममा सहभागी भएको स्वीकार गर्दै प्रधानाध्यापक अधिकारीले पार्टी अभियानमा नभई शिक्षकहरुका कुरा राख्न गएको दाबी गरे । तपाईको समस्या कुनै पार्टीको रुपान्तरण अभियानको बैठकमा राखेर समाधान हुन्छ त ? भन्ने जिज्ञासामा अधिकारीले पार्टीको पनि भूमिका हुने भएकाले आफुले कुरा राख्न बैठकमा गएको तर कुनै पार्टीमा आवद्ध नरहेको जिकिर गरे ।

विद्यालयमा आर्थिक पारदर्शीता कायम हुन नसकेको भन्दै बर्दघाट नगरपालिकाले ताकेता गरेपनि विद्यालय प्रशासनले सुनुवाई गरेको छैन । विद्यालयले सामाजिक परीक्षण मापदण्ड २०७८ बमोजिम समाजिक परीक्षण गरी पहिलो चौमासिकभित्र स्थानीय तहमा उपलब्ध गराउनुपर्ने र शिक्षा नियमावलीको नियम १७१ बमोजिम विद्यालयले अधिकार प्राप्त लेखापरीक्षकबाट लेखापरीक्षण गराई सो को प्रतिवेदन स्थानीय तहमा उपलब्ध गराउनुपर्नेमा हालसम्म पनि विद्यालयले आर्थिक वर्ष २०७८÷०७९ को समाजिक परीक्षण र लेखा परीक्षण प्रतिवेदन नगरपालिकामा बुझाएको छैन । नगरपालिकाले साउन २९ गते नियमानुसार शिक्षक अभिभावक संघ गठन गरी विद्यालयको समाजिक परीक्षण तथा लेखा परीक्षण गराई १५ दिन भित्र प्रतिवेदन पेश नगरे प्रचलित कानुन बमोजिम कारवाही हुने व्यहोरा सहितको पत्र विद्यालयलाई काटेको छ ।